«Ժամանակն է, որ ճիշտ գնահատվեն Եվրոպայի «սիրելի» Նիկոլ Փաշինյանի քայլերը». Ռոբերտ Ամստերդամ

Միջազգային իրավապաշտպան, Սամվել Կարապետյանի փաստաբանական խմբի անդամ Ռոբերտ Ամստերդամը ֆեյսբուքյան էջում գրել է․ «Ռուսաստան, 2009թ․։ Ընտրարշավի ժամանակ դատավոր Օլգա Կուդեշկինան համարձակվեց հրապարակայնորեն քննադատել իշխանություններին։ Օրվա իշխանությունները նրան անմիջապես պատժեցին՝ զրկելով աշխատանքից և մասնագիտական գործունեությունից։
Երբ Մարդու իրավունքների եվրոպական դատարանը քննեց այս դեպքը («Կուդեշկինան ընդդեմ Ռուսաստանի» գործով), սահմանեց հստակ իրավական ստանդարտ․ ընտրարշավների ժամանակ քաղաքական հայացքների համար մասնագետներին աշխատանքից ազատելը 10-րդ հոդվածի կոպտագույն խախտում է։ Դա պատժիչ գործիք է, որի նպատակն է հասարակության մեջ «սառեցնող ազդեցություն» (chilling effect) առաջացնելն ու մարդկանց լռեցնելը։
Այսօր Նիկոլ Փաշինյանի վարչակազմը Հայաստանում կիրառում է ճիշտ նույն ձեռագիրը։
Նախընտրական հավաքի ժամանակ բժշկուհի Արփինե Սողոյանը, ով պատերազմում անհետ կորածի քույր է, հրապարակայնորեն քննադատել էր վարչապետին։
Քաղաքական պատասխանատվություն ստանձնելու փոխարեն՝ Փաշինյանն արձագանքեց կոպիտ ագրեսիայով հենց փողոցում։
Սակայն պետական վրեժխնդրությունն այդքանով չսահմանափակվեց։ Նրա դուստրը՝ Տաթևիկ Սողոյանը, հաստատեց, որ բժշկուհի Սողոյանն ազատվել է աշխատանքից։
Երևանի քաղաքապետարանն արդեն շտապել է արդարանալ՝ պնդելով, թե ազատումը պարզապես «հաստիքների կրճատում է»՝ առողջության ապահովագրության ներդրման համատեքստում։ Այս էժանագին բյուրոկրատական քողարկումը, սակայն, որևէ վստահություն չի ներշնչում։ Աշխարհում ոչ մի բանական մարդ չի հավատա, որ երկրի ղեկավարի հետ բախումից անմիջապես հետո բժշկին աշխատանքից զրկելը սովորական զուգադիպություն է։
Սա սովորական աշխատանքային խնդիր չէ, այլ՝ վարչական բիրտ հաշվեհարդարի դասական օրինակ՝ միտված այլախոհությունը պատժելուն և հանրությանը ահաբեկելուն։ Երբ կառավարությունը զենք է դարձնում բժշկի ապրուստի միջոցը միայն այն պատճառով, որ նա համարձակվել է հարցեր ուղղել երկրի ղեկավարին, «ժողովրդավարական բարեփոխումների» մասին բոլոր հայտարարությունները դառնում են սին ու կեղծ։
Ժամանակն է, որ վերջապես ճիշտ գնահատվեն Եվրոպայի «սիրելի» Նիկոլ Փաշինյանի քայլերը, և ժողովրդավարական Արևմուտքը թերևս տեսնի այն, ինչ իրականում այսօր կատարվում է Հայաստանում»։