«Ծառերը կարող են «հայտնել» երաշտի մասին՝ քամու ժամանակ իրենց ճոճվելու ձևով»․ Լևոն Ազիզյան

«Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը ֆեյսբուքյան իր էջում գրել է․ «Ծառերը կարող են «հայտնել» երաշտի մասին՝ քամու ժամանակ իրենց ճոճվելու ձևով։ Հետազոտությունները ցույց են տվել, որ որքան չոր է ծառը, այնքան ավելի ցածր հաճախականությամբ է այն ճոճվում։

ԱՄՆ-ի գիտնականները ցանկանում են այս երևույթն օգտագործել ծառերի վիճակի մոնիթորինգի համար՝ սովորական ճանապարհային տեսախցիկների օգնությամբ։ Տեսագրությունների միջոցով հնարավոր կլինի արձանագրել ծառերի տատանումների հաճախականության նվազումը և դրանով գնահատել ջրային սթրեսի աստիճանը։
Ներկայում մեթոդը փորձարկվում է Հարվարդի անտառում։ Տեսախցիկներից ստացված տվյալները համեմատվում են հողի խոնավության և ծառերի հյութաշարժի չափիչ սենսորների տվյալների հետ։
Նոր տեխնոլոգիան ապագայում կարող է օգնել գնահատել անտառային հրդեհների վտանգը, ինչպես նաև ժամանակին հայտնաբերել չորացած կամ վտանգավոր ծառերը։ Սակայն մեթոդը դեռ փորձարարական փուլում է․ տվյալների հավաքագրումը կավարտվի 2026 թվականի ամռանը, իսկ առաջին արդյունքները սպասվում են 2027 թվականին»։