Լարված իրավիճակ՝ «Առինջ մոլ»-ում

Այսօր առավոտվանից լարված իրավիճակ է ստեղծվել «Առինջ մոլ» առևտրի կենտրոնում․ այս մասին հայտնում է ֆոտոլրագրող Գագիկ Շամշյանը։ Ըստ «Առինջ մոլ»-ի աշխատակիցների՝ առավոտյան իրավապահները կրկին այցելել են առևտրի կենտրոն և գործողություններ են իրականացնում, որի պատճառով աշխատակիցները չեն կարողանում իրենց առօրյա առևտուրն անել։ Աշխատակիցներն ի նշան բողոքի պատրաստվում են դիմել կտրուկ միջոցների, ընդհուպ փակելով Արտաշատի խճուղի-Սևան ավտոճանապարհը։ Այս պահին ոստիկանները բանակցություններ են տանում նրանց հետո, որպեսզի նման քայլի չդիմեն։

Ֆոտոլրագրողի հետ զրույցում «Առինջ մոլ»-ի աշխատակիցներն իրենց դժգոհությունն են բարձրաձայնել՝ ասելով․ «Տաղավարի տեր ենք։ Եկել, 20 խանութից ավել փակել են։ Պատճառաբանում են, թե բարձրավոլտ հոսանքալարերի տակ է գտնվում տարածքը, բայց հենց նույն պահին դիմացը շինարարություն է տեղի ունենում, ու նշված տարածքը ևս այդ հոսանքալարերի տակ է։ Ցավալի է նաև, որ մեզ ոչ մի փաստաթուղթ, ոչ մի հիմք չեն ներկայացնում, պարզապես բառացի փոխանցել են պատճառը ու ոչ աշխատանքային օրով եկել, պլոմբել են տաղավարներն ու գնացել»։