«Սիրո՞ւմ ես պետությունդ՝ մոռացիր գուլպաներդ»․ Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Շատ աղմուկ է հանել պատկերը, երբ ԱՄՆ–ում Հայաստանի դեսպանը ուղեղային կենտրոններից մեկի կազմակերպված միջոցառմանը մասնակցել և բանախոսել է յուրօրինակ դրես–կոդով՝ առանց գուլպայի։
Կարծում եմ, որ պետք չէ անել դիվանագիտական էթիկետի խախտման վերաբերյալ հապճեպ եզրակացություններ։ Իսկ գուցե դեսպանը այնքան է մտազբաղ եղել սպասվող միջոցառմամբ և Հայաստանն այնտեղ լավագույնս ներկայացնելու հոգսով, որ գուլպաների մասին չի էլ հիշել։ Այլ կերպ ասած, հնարավորինս քիչ մտածել է իր հագուկապի մասին, և հնարավորինս շատ՝ Հայաստանի։ Դա նշանակում է, որ միջոցառմանը առանց գուլպա մասնակցությունը ոչ թե դիվանագիտական էթիկետի խախտում է, այլ պետությանը անմնացորդ նվիրվածության վկայություն։ Սիրո՞ւմ ես պետությունդ՝ մոռացիր գուլպաներդ»։