«Ճապոնիայի որդեգրած նոր դոկտրինը՝ «Պրոակտիվ պացիֆիզմ»». Արա Պողոսյան

Քաղաքագետ Արա Պողոսյանի ֆեյսբուքյան գրառումը. «Փաշինյանի իշխանությունը հայտարարում է, որ իր կրեդոն խաղաղությունն է, ուստի ռազմական ուժերի արդիականացումը, կարծես թե, երկրորդ պլան է մղվել։ Բայց այստեղ հետաքրքիր է Ճապոնիայի որդեգրած նոր դոկտրինը՝ «Պրոակտիվ պացիֆիզմ» (անգլերեն՝ Proactive Pacifism կամ ճապոներեն ռազմավարական տերմինաբանությամբ՝ Proactive Contribution to Peace / 积极和平主义)։ Այս դոկտրինի շրջանակներում Ճապոնիան գտնում է, որ «պետք է էլ ավելի ակտիվ ավանդ ներդնի տարածաշրջանում և միջազգային հանրությունում խաղաղության ու կայունության ապահովման գործում՝ համակարգում իրականացնելով այլ երկրների, այդ թվում՝ իր դաշնակից Ամերիկայի Միացյալ Նահանգների հետ»։
Այս դոկտրինը ենթադրում է, որ խաղաղությունը պահպանելու համար պետք է ո՛չ թե պասիվ սպասել կամ միայն անվտանգային սպառնալիքներից խուսափելու բանաձև որդեգրել, այլ ակտիվ, նախաձեռնողական քայլերով միջազգային խաղաղությանն ու անվտանգությանը նպաստելու ռազմավարություն։
Համարում են, որ որպեսզի երկիրը խաղաղասեր լինի, նա պետք է ակտիվորեն մասնակցի տարածաշրջանային և գլոբալ անվտանգության ապահովմանը:
«Պրոակտիվ պացիֆիզմը» հիմնված է ռազմական զսպման կարողությունների բարձրացման վրա, զարգացնելով իր ռազմական տեխնոլոգիաներն ու պաշտպանական կարողությունները (օրինակ՝ հակահարված հասցնելու ունակությունը), որպեսզի հնարավոր ագրեսորները չհամարձակվեն հարձակվել (կանխարգելիչ):
Միաժամանակ այն ներառում է գլոբալ դաշինքների ամրապնդման ռազմավարությունը, ինչպես օրինակ՝ ակտիվ համագործակցություն ԱՄՆ-ի, Գերմանիայի, Ավստրալիայի, Հնդկաստանի (QUAD ձևաչափ) և ՆԱՏՕ-ի անդամ երկրների հետ:
Միջազգային խաղաղապահ առաքելություններին մասնակցությունը և միջազգային օրենքների վրա հիմնված կանխատեսելի միջազգային կարգի պահպանումը հանդիսանում են «Պրոակտիվ պացիֆիզմի» մյուս բաղադրիչները, որոնց համախումբը հանգում է ռազմա–դիվանագիտական բալանսի ձևավորմանն ու պահպանմանը, ինչը հանգում է իրական խաղաղության պահպանման երաշխիքին»: