Արշավիր Ղարամյանը ոստիկանություն է ներկայացրել ծառայողական ատրճանակը

«Արցախի հերոս», գեներալ-լեյտենանտ, Արցախի Հանրապետության Անվտանգության խորհրդի նախկին քարտուղար Արշավիր Ղարամյանը ոստիկանություն է ներկայացրել իր անվամբ հաշվառված ծառայողական ատրճանակը։

Օգոստոսի 4-ին նա ներկայացել է Երևանի Քանաքեռ-Զեյթունի բաժին և հանձնել «Arminius» տիպի 5․6 մմ տրամաչափի ատրճանակը, որը հաշվառված է եղել Արցախի Հանրապետության ոստիկանությունում։
Ղարամյանի խոսքով՝ ատրճանակը նա 2023 թվականի սեպտեմբերին տեղափոխել է Արցախից և ներկայացրել ոստիկանություն՝ օրենքով նախատեսված ընթացակարգն անցնելու, զենքը հաշվառելու և հետագայում վերադարձնելու նպատակով։

Ոստիկանությունում համապատասխան արձանագրություն է կազմվել, սակայն Ղարամյանը անհրաժեշտ փաստաթղթեր չի ներկայացրել, ինչի հետևանքով զենքը պահվել է ոստիկանությունում։ Դեպքի վերաբերյալ կազմված փաստաթղթերն ուղարկվել են Քննչական կոմիտե։

Արշավիր Ղարամյանը «Ոսկե արծիվ» շքանշանի ասպետ է և Արցախի Հանրապետության Անվտանգության խորհրդի նախկին քարտուղարը։