Թբիլիսիում հողի տակից բացվել են հայազգի բարերար Մելիք-Ազարյանցի տան թաքնված հարկերը

Թբիլիսիի Ռուսթավելի պողոտայում վերականգնման աշխատանքների ընթացքում բացվել են հայազգի բարերար Ալեքսանդր Մելիք-Ազարյանցի պատմական տան՝ նախկինում հողի տակ մնացած հարկերն ու ստորգետնյա հատվածները։ Նոր բացված տարածքները գտնվում են շենքի հիմքերի շրջանում և այժմ ուսումնասիրվում են վերականգնման աշխատանքների շրջանակում։
Մասնագետների ուշադրության կենտրոնում հատկապես շենքի խորքային հիմքերն են։ Տունը կառուցվել է 1912-1915 թվականներին՝ ճարտարապետ Նիկոլայ Օբոլոնսկու նախագծով, բարդ երկրաբանական պայմաններում՝ ձորի և նախկին աղբավայրի տարածքում։ Այդ պատճառով կառույցի հիմքը սովորականից շատ ավելի խորն է եղել․ շենքի տակ կառուցվել են նկուղներ և թունելներ, որոնք, ըստ վերականգնման ծրագրի տվյալների, ամրացված են եղել կապարի շրջանակով և հատուկ թրծված աղյուսով։
Ալեքսանդր Մելիք-Ազարյանցը Թիֆլիսում ծնված հայազգի խոշոր գործարար, առաջին գիլդիայի վաճառական և բարերար էր։ Նա զբաղվել է պղնձի արդյունահանմամբ ու վերամշակմամբ, ունեցել է ձեռնարկություններ Թիֆլիսում և Բաքվում, իսկ իր միջոցներով աջակցել է նաև հայկական հասարակական ու բարեգործական նախաձեռնություններին։ Մելիք-Ազարյանցը եղել է Կովկասի հայկական ազգագրական և բարեգործական ընկերությունների հիմնադիրներից։
Նրա կառուցած տունը ժամանակի համար բացառիկ շինություն էր՝ սեփական էլեկտրամատակարարմամբ, ջրամատակարարմամբ, ջեռուցմամբ, պատկերասրահով, կինոթատրոնով և այլ ենթակառուցվածքներով։ Շենքի կառուցման պատմությունը կապվում է նաև Մելիք-Ազարյանցի դստեր հիշատակի հետ, որի մահից հետո գործարարը որոշել էր մեծածավալ շինարարություն իրականացնել նրա հիշատակին: