«Բակերում տեղադրված արգելափակոցները վերածվել են անվտանգության լուրջ սպառնալիքի»․ Հրայր Կամենդատյան

Տնտեսագետ Հրայր Կամենդատյանի ֆեյսբուքյան գրառումը․ «Երևանի բակերում անվերահսկելի տեղադրված արգելափակոցները (շլագբաումները) վաղուց դուրս են եկել «հարմարավետության» սահմաններից և վերածվել քաղաքային անարխիայի ու անվտանգության լուրջ սպառնալիքի։
Խնդրի բուն էությունը
* Անվտանգության սպառնալիք. Հրդեհի, գազի արտահոսքի կամ բժշկական ծայրահեղ անհրաժեշտության դեպքում Փրկարար ծառայության, Շտապօգնության կամ Ոստիկանության մեքենաները բախվում են փակ դարպասների։ Յուրաքանչյուր կորցրած րոպեն մարդկային կյանք արժե, իսկ փակ բակերում արտակարգ ծառայությունները ստիպված են լինում կամ կոտրել արգելոցը, կամ հեռու կանգնել։
* Հանրային տարածքի զավթում. Շատ դեպքերում բնակիչների մի խումբ ապօրինի կերպով սեփականաշնորհում է համայնքային կամ ընդհանուր բաժնային սեփականություն հանդիսացող հողատարածքը՝ սահմանափակելով մյուս քաղաքացիների, հյուրերի կամ սպասարկող մեքենաների ազատ տեղաշարժը։
* Կարգավորման իսպառ բացակայություն. Ներկայումս չկա հստակ, գործուն մեխանիզմ, թե ով է տալիս տեղադրման թույլտվությունը, ինչ տեխնիկական չափանիշների (օրինակ՝ GPS/GSM ավտոմատ բացման համակարգեր, հերթապահի առկայություն) պետք է համապատասխանի արգելափակոցը և ով է կրում պատասխանատվություն արտակարգ իրավիճակում ճանապարհը փակ լինելու համար։
Անհապաղ լուծման քայլեր
* Լիակատար գույքագրում. Երևանի քաղաքապետարանը և Վարչական շրջանները պետք է անհապաղ գույքագրեն քաղաքում առկա բոլոր արգելափակոցները։ Ապօրինի տեղադրվածները ենթակա են անհապաղ ապամոնտաժման։
* Միասնական տեխնիկական չափորոշիչ. Թույլատրել միայն այն արգելափակոցները, որոնք ինտեգրված են 911/103 ծառայությունների ավտոմատ համակարգերին կամ ունեն 24/7 ռեժիմով աշխատող հեռակառավարվող/տեղում առկա հերթապահ մաս։
* Իրավական պատասխանատվություն. Սահմանել խիստ վարչական և ֆինանսական պատասխանատվություն համատիրությունների կամ բնակիչների այն խմբերի համար, որոնք փակում են արտակարգ ծառայությունների ճանապարհը։
Բակային տարածքները չեն կարող ծառայել որպես անհատական ավտոկանգառներ՝ ի հաշիվ մարդկանց անվտանգության ու կյանքի։ Քաղաքային իշխանությունը պարտավոր է վերջ դնել այս անօրինականությանը և հստակ կանոնակարգել դաշտը»։