«Ոստիկանների կողմից սպանություններ ու ավազակություններ կատարելը նոր երևույթ չէ»․ Րաֆֆի Ասլանյան

Փաստաբան Րաֆֆի Ասլանյանը ֆեյսբուքյան իր էջում գրել է․ «Վերջին օրերին համացանցում քննարկման առարկա են դարձել ոստիկանության բարձրաստիճան ծառայողի կողմից շահադիտական դրդումներով տարեց կանանց սպանության դեպքերը։ Ցավոք, մեր իրականության մեջ ոստիկանների կողմից կամ նրանց առերևույթ հանցակցությամբ շահադիտական դրդումներով (ավազակությամբ զուգորդված) սպանություններ, սպանության փորձեր, ավազակություններ կատարելը նոր երևույթ չէ։ Դեռևս Շիրակի մարզում աշխատանքի տարիներին ինքս մի քանի նման դեպքերով հիմնավոր կասկածներ ունեի բարձրաստիճան ոստիկանների մասնակցության վերաբերյալ, քրեական գործերով քննությունը վերցրեցի իմ անմիջական վերահսկողության ներքո, որոշակի ապացույցներ ձեռք բերելուց հետո դրանք, ըստ ենթակայության, ուղարկեցի իրավասու նախաքննական մարմին՝ ՀՀ հատուկ քննչական ծառայություն, սակայն ոստիկաններն, ինձ համար անհասկանալի եղանակով, խուսափեցին պատշաճ քրեական պատասխանատվությունից։
Այդ ոստիկանները առժամանակ հեռացվեցին իմ տեսադաշտից, իսկ հետագայում, այդ թվում՝ 2018 թվականից հետո ՔՊ-ական «հեղափոխական» իշխանության ձեռքով ստացան ավելի բարձր պաշտոններ։
Նման երևույթներն արմատախիլ անելու համար պարզապես կամք է պետք ամենաբարձր մակարդակով, որը չկա և չի եղել…»։