«Ռուբինյանը, Կոնջորյանը, Ալեքսանյանը իրականացնում են իրավունքի չարաշահում». Էդգար Ղազարյան

«Առաջին օրվանից, ինչ Ռուբինյան-Կոնջորյան-Ալեքսանյան, նախագահում են նիստերը, իրականացնում են իրավունքի չարաշահում: Իրենց խնդիրը՝ նիստի բնականոն ընթացքն ապահովելն է. լրացուցիչ մեկնաբանություն պետք է անի, եթե կարիքը կա՝ նիստի բնականոն ընթացքի տեսանկյունից, այլ ոչ թե իրա կարծիքը մեզ բոլորիս մի անգամ ավել ասելու հնարավորության համար»,- անդրադառնալով ԱԺ-ում տեղի ունեցած միջադեպին, մասնավորապես Վահագն Ալեքսանյանի խոսքին, ասաց ընդդիմադիր պատգամավոր Էդգար Ղազարյանը:

Հիշեցնենք՝ ԱԺ-ում իրավիճակը լարվել էր: Երբ ընդդիմադիր Արեգա Հովսեփյանի եզրափակիչ ելույթից հետո ՔՊ-ական փոխխոսնակ Վահագն Ալեքսանյանը սկսեց արձագանքել, դահլիճից հնչեցին քննադատություններ: Փոխխոսնակը ընդդիմադիր Դավիթ Ղազինյանին նկատողություն հայտարարեց՝ հորդորելով տեղից չխոսել: Նրա նկատմամբ կիրառվեց կարգապահական պատասխանատվություն՝ հեռացում դահլիճից: Նիստերի դահլիճ մտան անվտանգության աշխատակիցները: