«Արդյո՞ք քարոզչական ակտիվությունը փոխարինում է իրական արդյունքներին»․ Վահագն Սարոյան

Ռազմական փորձագետ Վահագն Սարոյանի ֆեյսբուքյան գրառումը․ «Արդյո՞ք քարոզչական ակտիվությունը փոխարինում է իրական արդյունքներին։
Վերջին օրերին նկատվում է ՊՆ-ի քարոզչական նյութերի ակնհայտ ակտիվություն։ Ենթադրելի է, որ այս ակտիվության նպատակներից մեկը հասարակության մեջ ձևավորված դժգոհության ալիքը մեղմելն է։ Վերջին շրջանում բանակում հաճախակի դարձած ոչ մարտական պայմաններում մահվան դեպքերը լուրջ հարցեր են առաջացրել, իսկ դրանց լուծման մասին արվող հայտարարություններն ու դրանց շուրջ ստեղծվող տեղեկատվական աղմուկը, կարծես, ավելի շատ նոր հարցեր են առաջացնում, քան պատասխաններ տալիս։
Եթե տարբեր հրապարակումներից զտենք քարոզչական բաղադրիչը, մնում է ամենակարևորը՝ ի՞նչ կոնկրետ արդյունքներ են արձանագրվել։
Որո՞նք են այն համակարգային փոփոխությունները, որոնք արդեն իսկ նվազեցրել են զինծառայողների կյանքի և առողջության համար առկա ռիսկերը։ Ի՞նչ է փոխվել զորամասերում։ Ի՞նչ է փոխվել հրամանատարական մշակույթում։ Որքա՞ն արդյունավետ են գործում վերահսկողության մեխանիզմները, և ամենակարևորը՝ ի՞նչ պատասխաններ են ստացել այն ընտանիքները, որոնք բանակում կորցրել են իրենց որդիներին։
Հասարակությունը կարող է լսել բազմաթիվ հայտարարություններ, տեսնել տասնյակ տեսանյութեր ու լուսանկարներ, բայց վերջնական գնահատականը տալու է ոչ թե հրապարակումների քանակին, այլ արդյունքին»։