Տիգրան Ավետիսյանը դարձավ Եվրոպայի ծանրամարտի չեմպիոն

Կոսովոյի մայրաքաղաք Պրիշտինայում շարունակվող մինչև 15 տարեկանների մրցաշարում Հայաստանի հավաքականի 75 կգ քաշային Տիգրան Ավետիսյանը դարձել է չեմպիոն։ Տեղեկությունը հայտնում են Հայաստանի ծանրամարտի ֆեդերացիայից։ «Ավետիսյանը պոկում վարժության երեք հաջող մոտեցումներով գլխավերևում պահեց 112, 119 և 122 կգ։ Այս վարժությունում նա դարձավ ոսկե մեդալակիր։ Հրում վարժությունում Ավետիսյանը գլխավերևում պահեց 140 և 146 կգ։ Այս ձևում ևս նա ոսկե մեդալակիր է։ Երկամարտի 268 կգ արդյունքով Տիգրան Ավետիսյանը դարձավ մինչև 15 տարեկանների Եվրոպայի առաջնության չեմպիոն»,- նշված է հաղորդագրության մեջ։
Ավելի վաղ Արթուր Պետրոսյանն (60 կգ) ու Հայկ Մովսիսյանը (70 կգ) դարձել էին Եվրոպայի Մ15 տարեկանների առաջնության փոխչեմպիոն։