Եվրոպական խորհրդարանը կոչ է արել անհապաղ ազատ արձակել հայ գերիներին

Եվրոպական խորհրդարանը բանաձև է ընդունել, որով դատապարտել է Ադրբեջանում քաղաքական բռնաճնշումներն ու մարդու իրավունքների խախտումները և պահանջել Բաքվում պահվող հայ գերիների անհապաղ և անվերապահ ազատ արձակումը։ Բանաձևին կողմ է քվեարկել 492 պատգամավոր, դեմ՝ 23-ը, ձեռնպահ՝ 60-ը։

Եվրոպական խորհրդարանի պատգամավոր Մարինա Մեզյուրը, որը բանաձևի համահեղինակներից է, հայտնել է, որ սկզբնական նախագծում հայ պատանդների հարցն ընդգրկված չի եղել։ Այս շաբաթ տեղի ունեցած բանակցություններից հետո նրան հաջողվել է ապահովել, որ այդ հարցն ընդգրկվի վերջնական տեքստում։

Բանաձևի 4-րդ կետում խորը մտահոգություն է արտահայտվում հայ քաղբանտարկյալների և ռազմագերիների, այդ թվում՝ Արցախի նախկին ղեկավարների ապօրինի պահման առնչությամբ։ Փաստաթղթում կոչ է արվում նրանց անհապաղ և անվերապահ ազատ արձակել: