«Ադրբեջանում մի միտում կա՝ անպայման ունենալ այն, ինչ ունեն հայերը». Սերժ Սարգսյանը ԵԽԽՎ-ում պատասխանել է Ադրբեջանի ներկայացուցչի հարցին

ՀՀ նախագահ Սերժ Սարգսյանը՝ պատասխանելով ԵԽԽՎ-ում Ադրբեջանը ներկայացնող Սամեդ Սաիդովի հարցին, նրան կոչ է արել նախ հանդարտվել, ապա չխեղաթյուրել իր խոսքերը:

Սերժ Սարգսյանը նշել է, որ ինքը մասնակից է եղել ԼՂ ժողովրդի արդար պայքարին: Թե ինչու իր ելույթում չի հիշատակել Խոջալուի դեպքերը, պատասխանել է. «Այդ ցավալի իրադարձություններից անմիջապես հետոո Ադրբեջանի նախկին նախագահ Այազ Մութալիբովը հանգամանորեն և տեղեկացված ձևով փաստեր է շարադրել և հստակ ցույց տվել, թե ովքեր են եղել այդ ջարդի կազմակերպիչները: Ցեղասպանությունը լավ բան չէ, դա պատիվ չէ, դա տանջանք է: Ադրբեջանում մի միտում կա՝ ունենալ այն, ինչ ունեն հայերը: Ի՞նչ է՝ ձեզ պե՞տք է մի բանն անվանել ցեղասպանություն, որը երբեք չի եղել, և հատկապես հայերի կողմից չի եղել»:

Նա նաև պատասախանել է միջազգային կառույցներում Հայաստանի պարտավորությունների մասին հարցին՝ ասելով, որ չկա միջազգային կառույցների կողմից ընդունված որևէ որոշում, որը Հայաստանի կողմից մերժվում է:

Սերժ Սարգսյանը նաև Ադրբեջանի ներկայացուցչին խորհուրդ է տվել ուսումնասիրել բարձրացված թեման՝ նկատի ունենալով ՄԱԿ-ի Անվտանգության խորհրդի բանաձևերը, որով ամրագրված դրույթներն Ադրբեջանի կողմից չեն կատարվում: «Դուք անհնարինն եք ուզում: Դուք ուզում եք Ադրբեջանի կազմ վերադարձնել Ղարաբաղը: Ցավոք սրտի, այլատյացությունն Ադրբեջանում այնքան է զարգացել, որ արդեն բացահայտ հայտարարում եք, որ Ղարաբաղը ձեզ պետք է առանց հայերի: Անհնար է, դա երբեք չի լինելու»,- հավելել է ՀՀ նախագահ Սերժ Սարգսյանը: