«Այստեղ պատճառահետևանքային կապ չկա». Արամ Օրբելյանը՝ Ռոբերտ Քոչարյանի կալանավորման մասին

«Անձեռնմխելիության իմաստը կայանում է նրանում, որ անձը կատարելով հանցագործություն (իհարկե, ես չեմ նշում, որ Քոչարյանը կատարել է հանցագործություն), ոչ միայն ազատվում է պատասխանատվությունից, այլև ցանկացած գործընթացիք, որը ենթադրում է հետապնդում, այսինքն՝ ոչ թե պետք է գործը քննել, վերջում տեսնել՝ անձը կատարե՞լ է հանցագործություն, թե՞ չէ և ասել՝ դու ազատված ես, այլ . չպետք է գործն սկսել: Անձեռմխելիությունը չի ազատում անձին որպես վկա հարցաքննվելուց, բայց ցանկացած գործընթաց, որն ուղղված է իր դեմ՝ կասկածյալ, մեղադրյալ, ամբաստանյալ, ինքը պետք է ազատված լինի այդ ամենից, նա չի կարող հետապնդվել»,- այսօր լրագրողների հետ զրույցում՝ անդրադառնալով ՀՀ երկրորդ նախագահի առաջադրված մեղադրանքին, ասել է վերջինի փաստաբան Արամ Օրբելյանը:

Փաստաբանը նշել է, որ ինքն անձամբ չի հասկանում, թե ինչում են իր պաշտպանյալին մեղադրում: «Մեջբերվում է 300.1 հոդվածը: Մոտավորապես նույնն է, որ ասեն՝ Արամ Օրբելյանը առավոտյան վեր կացավ, գնաց ցնցուղ ընդունեց, սափրվեց, իջավ նստեց ավտոմեքենա, ճանապարհին բենզին լցրեց և դրա համար ինքը մեղադրվում է գողության համար: Մոտավորապես նման տեքստ է: «Այստեղ պատճառահետևանքային կապ չկա, ես չեմ կարողանում հանցագործության էլեմենտը մինչև վերջ հասկանալ, չեմ հասկանում՝ մեղադրվում է զորք օգտագործելո՞ւ, արտակարգ իրավիճակ մտցնելո՞ւ մեջ: Ի՞նչն է կոնկրետ, չկա, գրված չէ, թե հստակ որ արարքն է, որ կարողանանք վիճել կամ չվիճել: Գործը բավարար ուսումնասիրված ու մշակված չէ քննչական մարմինների կողմից»,- ասել է Արամ Օրբելյանը: