Պատգամավորները ստորագրահավաք են սկսել՝ ի պաշտպանություն Ռոբերտ Քոչարյանի

ԱԺ ՀՀԿ խմբակցության նախաձեռնությամբ ստորագրահավաք է սկսվել՝ ի պաշտպանություն ՀՀ երկրորդ նախագահ Ռոբերտ Քոչարյանի: Այս մասին հայտնել է Ռ. Քոչարյանի գրասենյակի ղեկավար Վիկտոր Սողոմոնյանը:

Վերջինի խոսքով՝ ՀՀ երկրորդ նախագահի խափանման միջոց կալանքը փոխելու ստրոգրահավաքին այս պահի դրությամբ միացել է 38 պատգամավոր, որոնց թվում նաև ԱԺ նախագահ Արա Բաբլոյանն է:

Հիշեցնենք՝ ՀՔԾ-ն մեղադրանք էր առաջադրել Ռոբերտ Քոչարյանին՝ 2008թ. մարտի 1-ի իրադարձությունների ժամանակ սահմանադրական կարգը տապալելու համար: Նույն մեղադրանքն առաջադրվել է նաև պաշտպանության նախկին նախարար Միքայել Հարությունյանի և ՀԱՊԿ ներկայիս գլխավոր քարտուղար Յուրի Խաչատուրովի նկատմամբ:

Ռոբերտ Քոչարյանը կալանավորված է:

Ավելի վաղ տեղեկացրել էինք, որ ՀՀԿ մամուլի խոսնակ, ԱԺ փոխնախագահ Էդուարդ Շարմազանովը Интерфакс-ին ասել է, որ պատրաստ է միջնորդել ՀՀ երկրորդ նախագահ Ռոբերտ Քոչարյանի համար. «Անհրաժեշտության դեպքում պատրաստ եմ դիմել գլխավոր դատախազին, որպեսզի փոխվի Ռ. Քոչարյանի նկատմամբ խափանման միջոցը»,- ասել է Շարմազանովը՝ նշելով, որ պատրաստ են միջնորդել նաև այլ պատգամավորներ: