«Բա որ նախարար էիք, պատգամավոր, այդ մոնիթորինգի, ԵԽԽՎ֊ի, ԵԽ֊ի, մարդու իրավունքի մասին չգիտեի՞ք». Արթուր Սաքունցը՝ Արփինե Հովհաննիսյանին

Իրավապաշտպան Արթուր Սաքունցը ֆեյսբուքյան իր էջում գրել է.

«Ահագին բան գիտի, բանից պարզվում է, տիկին Արփինե Հովհաննիսյանը, էլ ԵԽ, էլ ԵԽԽՎ, էլ մոնիթորինգ, էլ մարդու իրավունք, էլ խոսքի ազատություն, էլ քաղաքական հետապնդում...

Ահագին զարգացում կա մտքի, խոսքի մեջ..

Բա որ նախարար էիք, ԱԺ պատգամավոր էիք, կամ երբ իշխանություն էիք, կամ մինչ այդ էլ, այդ մոնիթորինգի, ԵԽԽՎ֊ի, ԵԽ֊ի, մարդու իրավունքի մասին չգիտեի՞ք, կամ չէիք լսու՞մ, երբ մարդու իրավունքից, խոսքի ազատությունից, քաղաքական հետապնդումներից խոսում էինք, թե միայն քաղաքական նպատակահարմարությամբ, սեփական անպատժելի ու կոռումպացված իշխանության պահպանմամբ ու սպասարկմամբ էիք զբաղված, աչքակապությամբ։

Թե, երբ գալիս է պատասխանատվեւթյուն կրելու, ոտ ու ձեռք ընկած մարդու իրավունք եք հիշում՝ թզենու տերևի տեղ օգտագործելու համար։

«Պաշտպանիր, որ պաշտպանված լինես»․ պետք էր՝ հիշեիք։

Լավ է, որ բարձրացրել եք, ահագին խոսք կա ասելու, բայց կոռուպցիայի և մարդկության դեմ հանցագործություններ կատարածների դեմ քրեական հետապնդումները չփորձեք հանկարծ քաղաքական հետապնդում ներկայացնել։

Չփորձեք․ շատ խիստ կհակադարձվեք։

Չփորձեք վիրավորել մարդու իրավունքի սկզբունքը, արժեքը անպատժելիության, մարդկանց ճակատագրերը խեղած Ձեր ձեռքերով։

Դուք դեռ նույնիսկ ներողության խոսք անգամ չեք ասել Ձեր իշխանության գործած լկտիությունների համար։

Խոսքի բարոյական ու իրավականը խառնել եք իրար»։