«Վաղաժամ էին ՀՔԾ-ով խանդավառվելու հույսերը». Մուշեղ Շուշանյան

Փաստաբան Մուշեղ Շուշանյանը ֆեյսբուքյան իր էջում գրել է.

««Սարի թաղի դեպքերի վերաբերյալ» (ինչպես նշված է ՀՔԾ հաղորդագրության մեջ) քրեական գործի վարույթը կասեցնելու որոշումը լուրջ մտորումների և հեռուն գնացող հետևությունների տեղիք է տալիս։ Նախ՝ «Սարի թաղի դեպքեր» բառակապակցության գործածումը դրա հեղինակների կողմից մատնում է եղելությունը լղոզելու միտումը, քանզի տեղի չեն ունեցել «Սարի թաղի դեպքեր», այլ 2016թ. հուլիսի 29-ին տեղի է ունեցել շատ կոնկրետ, խիստ որոշակի հանցագործություն՝ ոստիականական, այն է՝ հանցավոր ռեժիմի ենիչերիական ելուզակները՝ Լևոն Երանոսյանի հրամանատարությամբ, «իրականացրել են վայրենաբարո պատժիչ գործողություն խաղաղ հավաքի մասնակից քաղաքացիների նկատմամբ։ Որպես ականատես կարող եմ վկայել, որ միայն երջանիկ պատահականությամբ չենք ունեցել մարդկային զոհեր։ 2008-ի մարտի 1-ի (որի իրադարձությունների ականատես նույնպես եղել եմ) հետ այս հանցավոր հատուկ գործողության տարբեությունն այն էր, որ չէին «աշխատում» դիպուկահարները և, որքան հասկացել եմ, (եթե սխալվում եմ՝ թող ինձ ուղղեն) հատուկ միջոցները (լուսաձայնային նռնակները) օգտագործվում էին ոչ թե դիմահար՝ ուղղված դեպի մարդկանց մարմինները, այլ օդից «կախվում» էին մարդկանց հոծ բազմության մեջ։ Ամենայն հավանականությամբ «озверин»-ի ազդեցության տակ գտնվող ենիչերիների բանդան գործում էր բացառիկ դաժան ու արյունարբու կերպո՝ առաջին թիրախ դարձնելով լրագրողներին։
ՀՔԾ այս որոշումը կարող է վկայել այն մասին, որ վաղաժամ էին ՀՔԾ-ով խանդավառվելու հույսերը, որ առաջացան Մարտի 1-ը բացահայտելու և դրա պատասխանատուներից գլխավորին պատասխանատվության կանչելու, կարծես թե, կամքի դրսևորման հետ։
ՀՔԾ ղեկավարը, իր ղեկավարած կառույցի հանդեպ առաջացած օբյեկտիվ կասկածները փարատելու համար, պետք է պաշտոնանկ անի Սարի Թաղի սպանդի գործով որոշում կայացրած քննիչին, իսկ գործը նոր ստանձնած քննիչը/քննչական խումբը, շատ օպերատիվ կերպով, պիտի մեղադրանքներ առաջադրեն բազմաթիվ տեսանյութերում ֆիքսված ենիչերիական հրոսակախամբի ղեկավարներին և շարքային ենիչերիներին։ Հակառակ դեպքում՝ հաստատվում է վաղուց հնչեցված այն պարզ և ճշմարիտ միտքը, որ առանց լյուստրացիայի իրականացման, մասնավորապես՝ հանցավոր ռեժիմին ծառայած իրավապահ մարմինների կադրերից ազատվելու, հեղափոխության հաղթական ավարտի մասին երազելը նման կլինի երազախաբության»։