Չորեքշաբթի, 12 դեկտեմբերի, 2018 թ.
|
Ստեփանակերտում`   +9 °C

Ի՞նչ է քննարկվել Նիկոլ Փաշինյանի և խորհրդարանական ուժերի միջև. մանրամասներ

Ի՞նչ է քննարկվել Նիկոլ Փաշինյանի և խորհրդարանական ուժերի միջև. մանրամասներ
148
Չորեքշաբթի, 03 հոկտեմբերի, 2018 թ., 12:10

«Մի քանի դրվագներում շեշտվեց, որ թեկնածու չեն առաջադրելու, բայց չկա հուշագիր, և դրանք բանավոր խոսակցություններ են»,- Աժ-ում լրագրողների հետ զրույցում ասաց «Ելք» խմբակցության պատգամավոր Էդմոն Մարուքյանը՝ անդրադառնալով Նիկոլ Փաշինյանի ու խմբակցությունների ներկայացուցիչների հետ հանդիպմանը: Նա նշեց, որ խմբակցությունների հետ պայմանավորվածություն կա, որ շփումները շարունակվեն. «Երեկ մի քանի ժամ գտնվել ենք Աժ նախագահի սենյակում, քննարկել գաղափարներ, որի արդյունքում վարչապետը ներկայացրել է իր ծրագիրը: Վարչապետը կտա հրաժարական, 14 օրում խորհրդարանը չի առաջադրի թեկնածու, իրավունքի ուժով այն կարձակվի, և կլինեն ԱԺ արտահերթ ընտրություններ: ՀՀ-ում այնպիսի իրավիճակ է, որ չկա հնարավորություն այլ մարդու առաջադրելու և վարչապետ ընտրելու: Անգամ եթե թեկնածու առաջադրվի, դա հերթական ձախողված քայլն է լինելու և որևէ արդյունք չի տալու ռևանշի կամ իրավիճակը փոխելու իմաստով, ոչ մեկ լուսնից չի իջել»:

Էդմոն Մարուքյանի խոսքերով՝ մյուս խմբակցությունների ներկայացուցիչները համաձայն էին խորհրդարանի արձակմանը, սակայն մայիսին. «Վարչապետն այնուհետ ասաց, որ պատրաստ են Ընտրական օրենսգիրքն ընդունել այս օրերի ընթացքում: Չեղավ ընդհանուր կոնսենսուս, և մենք դուրս եկանք»: