Կիրակի, 16 դեկտեմբերի, 2018 թ.
|
Ստեփանակերտում`   +1 °C

«Հարց է առաջանում՝ այդ դեպքում էլ ի՞նչ անձեռնմխելիություն». Հայկ Ալումյան

«Հարց է առաջանում՝ այդ դեպքում էլ ի՞նչ անձեռնմխելիություն». Հայկ Ալումյան
96
Երկուշաբթի, 03 դեկտեմբերի, 2018 թ., 17:50

«Դատախազը փորձում է դետալ առ դետալ անդրադառնալ մեր բոլոր փաստարկներին, չէի ասի, թե համոզիչ էին հակափաստարկները, բայց, համենայնդեպս, մանրակրկիտ աշխատել են»,- լրագրողներին ասել է Ռոբերտ Քոչարյանի պաշտպան Հայկ Ալումյանը:

Պատասխանելով անձեռնմխելիության մասին հարցին, Հ. Ալումյանը նշել է. «Գլխավոր դատախազի ասածի տրամաբանությունն այն է, որ նա կարծում է, որ անձեռնմխելիությունն անհամատեղելի է օրենքի խախտման հետ, այսինքն՝ եթե որևէ մեկին օրենքի խախտում է վերագրվում, տվյալ պարագայում նախագահին, և այդ խախտումն իր լիազորությունների մեջ չի մտնում, ապա ինքն անձեռնմխելի չէ: Հարց է առաջանում. այդ դեպքում էլ ի՞նչ անձեռնմխելիություն, եթե այդ մարդուն չվերագրվի օրենքի խախտում, եթե վերագրվեն գործողություններ, որոնք լիարժեք իր լիազորությունների մեջ են, ուրեմն էլ ի՞նչ քրեական վարույթ»:

Հ. Ալումյանն անդրադարձել է նաև սահմանադրական կարգի տապալման մեղադրանքին. «Որոշ վերլուծաբաններ խորը մոլորության մեջ են գցել հասարակությանն՝ ասելով, որ սահմանադրական կարգի տապալումն ամենածանր մեղադրանքն է, և ուրեմն դրա վրա չի կարող տարածվել անձեռնմխելիությունը: Հավատացնում եմ՝ շատ ավելի ծանր մեղադրանքներ կան»:

«Նոր երևան եկած հանգամանքներով բողոքը դատարանը թողել է առանց քննության, դատարանը գտել է, որ այդ հանգամանքները պետք է ոչ թե որպես նոր երևան եկած հանգամանք քննարկվեն, այլ որոշեց դատավարության շրջանակներում քննության առնել»,- ասել է Ռոբերտ Քոչարյանի պաշտպանը՝ հավելելով, որ հաջորդիվ կլսվեն նաև դատախազների ելույթները, որից հետո իրենց հնարավորություն կտրվի միջնորդություններ ներկայացնել: