Ուղիղ միացում՝ ԱԺ-ից. խորհրդարանն այսօր փոխխոսնակներ կընտրի

463

Երեքշաբթի, 15 հունվարի, 2019 թ., 10:00

«ԱԺ կանոնակարգ» սահմանադրական օրենքի 137-րդ հոդվածի համաձայն՝ ԱԺ նախագահի տեղակալների պաշտոններում պատգամավորների կազմից թեկնածուների առաջադրման իրավունքը պատկանում է խմբակցություններին: ԱԺ նախագահի երեք տեղակալներից մեկի թեկնածուն կարող է առաջադրվել միայն ընդդիմադիր խմբակցության կազմում ընդգրկված պատգամավորների թվից: Խորհրդարանի նախագահի տեղակալներն ընտրվում են գաղտնի քվեարկությամբ՝ պատգամավորների ընդհանուր թվի ձայների մեծամասնությամբ:

«Իմ քայլը» խմբակցության ղեկավար Լիլիթ Մակունցն ԱԺ նախագահի տեղակալի պաշտոնում ընտրվելու համար խմբակցության կողմից ներկայացրել է Ալեն Սիմոնյանի թեկնածությունը:

Լիլիթ Մակունցն այնուհետև ԱԺ նախագահի տեղակալի պաշտոնում ընտրվելու համար խմբակցության կողմից առաջադրել է Լենա Նազարյանի թեկնածությունը:

ԱԺ նախագահի ընդդիմադիր տեղակալի պաշտոնում ընտրվելու համար ներկայացվել է երկու թեկնածություն: Սերգեյ Բագրատյանն ԱԺ «Բարգավաճ Հայաստան» խմբակցության կողմից ներկայացրել է Վահե Էնֆիաջյանի թեկնածությունը:

ԱԺ «Լուսավոր Հայաստան» ընդդիմադիր խմբակցության կողմից ԱԺ նախագահի տեղակալի պաշտոնում խմբակցության ղեկավար Էդմոն Մարուքյանն առաջադրել է Մանե Թանդիլյանի թեկնածությունը: