«Իրենք շատ լավ ուսուցիչ են, մենք՝ հիմար աշակերտ. դասեր չենք քաղում»․ Վովա Վարդանով

Այս օրերին Ադրբեջանի բանակն անցկացնում է պլանային բնույթի լայնամասշտաբ զորավարժություններ, որոնց ներգրավված է շուրջ 10000 անձնակազմ: Այսօր՝ մամուլի ասուլիսի ժամանակ, այս առիթով ռազմական փորձագետ Վան Համբարձումյանն ասաց. «Զորավարժությունները հենց այսպես տեղի չեն ունենում, դրանք հիմնականում պայմանավորված են լինում աշխարհաքաղաքական իրավիճակների փոփոխությամբ: Ալիևը հայտարարել էր, որ 2019 թիվը լինելու է վճռորոշ: Տարին նոր է սկսվել, իսկ սա արդեն երրորդ զորավարժությունն է, էս քանակը շատ բաների մասին է խոսում»:
Փորձագետը պարզաբանեց, թե ինչու է այս զորավարժությունները համարում աննախադեպ.
«Երբ ես աշխատում էի ԶՈՒ գլխավոր շտաբում, յուրաքանչյուր զորավարժություն ընկալվում էր որպես պատերազմի սկիզբ, սրան վերաբերվում են լրջորեն»:
Բանախոսի խոսքով՝ ուժային կուտակումները քողարկվում են զորավարժություն անվան տակ. «Ես կարծում եմ, որ այս կուտակումները կանխատեսում են բանակցային սեղանի շուրջ սրացումներ»,- ասաց Վան Համբարձումյանը:
Ի հակադարձում բանախոսի՝ առաջին հետախուզադիվերսիոն ջոկատի հիմնադիր, հրամանատար Վովա Վարդանովն ասաց. «Անցած տարի էլ նույն ձևով եղել է չհայտարարված, ոչ պլանային զինախաղեր: Նման բաներ մշտապես լինում են, մշտական լարվածության մեջ են պահում. ուղղակի մենք թուրքին որպես ուսուցիչ ունենալով՝ շատ վատ աշակերտ ենք, թուրքը մեզ ասում է՝ հայեր պատրաստվեք, ԵԱՀԿ-ն ասում է՝ պատրաստվեք, հասարակությունը պատրաստեք, որ հանկարծ չպարտվեք: Իրենք շատ լավ ուսուցիչ են, մենք՝ հիմար աշակերտ. դասեր չենք քաղում:
Վարդանովի խոսքով՝ չպետք է հասարակությանը խուճապի մատնել նմանատիպ հայտարարություններով. «Եկեք չգոռանք, եկեք աշխատենք: Եկեք ասենք, որ թուրքն իր հերթական նոր զենքերը փորձեց, փորձարկումներ արեց, ոչ մի աննախադեպ բան չկա»,- ասուլիսի ժամանակ ընդգծեց հրամանատարը:
Անդրադառնալով Ադրբեջանի ձեռք բերած Բելառուսում արտադրվող 301 մմ տրամաչափի «Պոլոնեզ» համազարկային կրակի ռեակտիվ համակարգին՝ Վովա Վարդանովը նշեց. «Ոչ մի աննախադեպ բան չկա, նոր զենքեր են գնել, այդ զենքերը կիրառում են: Ցանկացած նոր զորախաղերի ժամանակ ադրբեջանցիները ինչ-որ նոր զինատեսակ պետք է ունենան: Խնդիրն այն է, որ մեր բնակչությունը, մեդիադաշտը (ուզենալով, թե չուզենալով), համենայնդեպս, վախեցնում է այդ «աննախադեպ» բառով:
Սակայն ռազմական փորձագետ Վան Համբարձումյանը պնդում է հակառակը. նրա խոսքով՝ նման զինատեսակներ երբևէ չեն կիրառվել և դրանից կարելի է եզրակացնել, որ ադրբեջանական զինուժը լուրջ մտադրություններ ունի:

«Այդ զինատեսակից Հայաստանի Հանրապետությունը չունի պաշտպանություն հակակշիռ զենք»,- թեման եզրափակեց փորձագետը: