«Ուրախ եմ, որ կարողացել ենք Ադրբեջանի նախագահի հետ ուղիղ, անկեղծ, ազնիվ և կառուցողական խոսակցություն ծավալել». Նիկոլ Փաշինյան

«Կարծում եմ՝ վերջին շրջանում խաղաղության օրակարգը, բանաձևը կյանքի կոչելու առաջարկներ ներկայացնելն ադրբեջանցի գործընկերներին և հանրությանը, մեր ամենակարևոր անելիքներից մեկն է»,- այսօր Ստրասբուրգում ԵԽԽՎ գարնանային նստաշրջանի լիագումար նիստի ժամանակ ասաց ՀՀ վարչապետ Նիկոլ Փաշինյանը՝ անդրադառնալով Արցախի հարցի խաղաղ կարգավորմանը:

«Ուրախ եմ, որ կարողացել ենք Ադրբեջանի նախագահ Իլհամ Ալիևի հետ բավականին ուղիղ, անկեղծ, ազնիվ կառուցողական խոսակցություն ծավալել: Մենք, ցավոք, դեռևս ընդհանուր պատկերացումներ չունենք Ղարաբաղի հարցի կարգավորման նրբությունների մեխանիզմների մասին, բայց այն, որ մենք կարողացել ենք կառուցողական, անկեղծ քննարկման մթնոլորտ ստեղծել, դա արդեն իսկ բավականին լավ է:

Այսօր կարևորագույն մի քանի հարց կա, որ մենք պետք է պատասխանենք խաղաղության օրակարգը ինստիտուցիոնալ առումով ուժեղացնելու համար: Այդ հարցերից մեկը ԵԱՀԿ Մինսկի խմբի ֆորմատի լիարժեք գործարկումն է, որը ենթադրում է նաև Լեռնային Ղարաբաղի ներկայացուցիչների մասնակցությունը կարգավորման խախաղ գործընթացին»,- ասել է Փաշինյանը: