«Ադրբեջանցի երկու նախարարներն անհանգիստ են ու հակասում են միմյանց». Աշոտ Ասատրյան

Ռազմական վերլուծաբան Աշոտ Ասատրյանը ֆեյսբուքյան իր էջում գրել է. «Ադրբեջանցի երկու նախարարներն անհանգիստ են ու հակասում են միմյանց: Նախ Ադրբեջանի պաշտպանության նախարար Զաքիր Հասանովն ուրբաթ օրը լայնածավալ օպերատիվ-մարտավարական զորավարժությունների արդյունքներին նվիրված ծառայողական խոհրդակցություն անցկացրեց ու ընթացքում, անդրադառնալով տարածաշրջանում առկա ռազմաքաղաքական իրավիճակին, Հասանովն ընդգծեց, որ Հայաստանում տեղի ունեցող ներքաղաքական դիմակայությունները կարող են սրել լարվածությունը շփման գծում: Օրեր անց, արդեն ԱԳ նախարար Էլմար Մամեդյարովը, «Կոմերսանտ» թերթին տված հարցազրույցում հայտարարեց, որ Ադրբեջանը հույսեր է կապում Հայաստանի ղեկավարության ողջամտության հետ: Մամեդյարովը հայտարարել է, որ իրենք հույսեր ունեն, թե Հայաստանի նոր իշխանությունը կգիտակցի Ադրբեջանի հետ հարաբերությունների կարգավորման անհրաժեշությունը: Փաստացի՝ Ադրբեջանի երկու պետական կառույցների ղեկավարները տարբեր հայտարարություններով հակասում են միմյանց, քանի որ ռազմական ղեկավարությունն անհանգիստ է, որ Հայաստանի իշխանությունը հնարավոր է սահմանին իրավիճակը լարի, իսկ քաղաքական ղեկավարությունը հույսեր է կապում այդ նույն իշխանության հետ ու դա ընդամենը մի քանի օրերի տարբերությամբ: Չգիտեմ, թե մեկ կամ երկու օրվա ընթացքում ինչ է փոխվում Ադրբեջանի ռազմա-քաղաքական ղեկավարության տրամադրվածության մեջ, սակայն այն հանգամանքը, որ սրանք երկու հարթակով ակտիվ աշխատում են ու թեկուզ իրար հակասելով քարոզչություն են իրականացնում, պետք է անհանգստացնի մեզ ու հետագա աշխատանքներում առավել զգոն ու միասնական գործենք»: