«Վանոյից մինչև Օսիպյան». Արտակ Գալստյան

Դատական փորձագետ Արտակ Գալստյանը ֆեյսբուքյան իր էջում գրել է. «Վանոյից մինչև Օսիպյան... Երկրում հնչում են բռնության կոչեր և զինված հեղաշրջում կատարելու փորձի մասին լուրեր: Փողոցները և ճանապարհային նշանները ներկվում են «սուտի Նիկոլ» գրառումներով, փաստացի գույքային վնաս է հասցվում պետությանը: Բախումներ են տեղի ունենում Սորոսի գրասենյակի դիմաց: Ծեծեցին ՀԱԿ ակտիվիստին: Որոշ քաղաքական գործիչներ, արհամարհելով ՀՀ օրենսդրությունը և իշխանությանը, քրեական հանցանքը վեր ածեցին Ֆլեշմոբի և հայտարարեցին, որ իրենք են ծեծել: Ամեն օր հանրապետության տարբեր անկյուններից լսվում են՝ պայթյունների, սպանությունների և այլ ծանր հանցագործությունների մասին լուրեր: Վարչապետը կոշտ հանձնարարականներ տվեց ուժայիններին: Օսիպյանն սկսեց օպերատիվ գործողություններ և թմբկահարեց արդյունքների մասին՝ 5 հատ հարբած վարորդ, 5 հատ հետախուզման մեջ գտնվող ավտոմեքենա, վարչական տույժեր, մգեցված ապակիներ, ԱՊՊԱ-ի բացակայություն, դռիկներով մեքենաներ, բարձր երաժշտություն՝ կատարող անձինք վնասազերծվել են, օպերատիվ գործողությունները կլինեն շարունակական: Երեկ՝ ուշ երեկոյան, հրկիզեցին «իշխող» Աբովյանի քաղաքապետի «Քաղաքացիական պայմանագիր» կուսակցության թեկնածուի շտաբներից մեկի պետի ավտոմեքենան ու բնակարանը: Նախկին ՆԳ նախարար Վանո Սիրադեղյանին հաջողվեց ընդամենը երկու ամսվա ընթացքում, պատերազմող երկրում, վերաբացել փակված ոստիկանական բաժանմունքները, զինաթափել վայ ֆիդայիներին, հավաքել գրեթե բոլոր զենքերը, վերացնել թիկնապահներով շրջողներին, կարգ ու կանոն հաստատել երկրում՝ այն դարձնելով անվտանգ ՀՀ օրինապաշտ քաղաքացու համար: Օսիպյանին սրա 10%-ը չի հաջողվում՝ արդեն մեկ տարուց ավելի: Հարց՝ ինչո՞ւ: Փորձեմ պատասխանել Օսիպյանի փոխարեն.
-Վանոյի ժամանակ հեշտ էր. հանցագործությունները սահմանափակվում էին սպանություններով, տեռորիզմով, հափշտակություններով, զինված խմբավորումներ և կառույցներ ստեղծելով, պետական հեղաշրջման փորձեր կատարելով և ԱԺ գրավելով: Այդ պատճառով Վանոյի մոտ ստացվեց: Հիմա դժվար է: Վանոյի ժամանակ առանց ԱՊՊԱ ավտոմեքենա չէին վարում, հիմա վարում են: Վանոյի ժամանակ մգեցված ապակիներ չկային, հիմա կան: Վանոյի ժամանակ փողոցն անցումով էին անցնում, հիմա հոծ գիծ են տրորում: Վանոյի ժամանակ 23:00-ից հետո բարձր երաժշտություն չէին միացնում, հիմա ռեցեդեվիստները միացնում են: Վանոյի ժամանակ 90-ականներն էին, տեսախցիկ չկար, տեխնիկան զարգացած չէր, համացանց չկար, ոստիկանները գրում էին գրիչով, աշխատում էին ուղեղով, իսկ հիմա ամեն ինչ բարդ է, ավտոմատացված, ժողովուրդն ամեն ինչ տեսնում է, ձայնագրում, հանցագործությունների մասին տեղեկությունները հրապարակում, հարյուրներով գալիս են հաղորդում են տալիս, մի խոսքով խանգարում են ոստիկաններին հանգիստ ապրել: Հիմա հասկացա՞ք տարբերությունը: Ես չգիտես՝ ինչո՞ւ վստահ եմ, որ ևս մեկ-երկու օպերատիվ գործողություն և ՀՀ- ում կվերանան մգեցված ապակիներով բոլոր ավտոմեքենաները, բոլորը փողոցը կանցնեն անցումներով, անկախ դիրքից և պաշտոնից, բոլորն ԱՊՊԱ կունենան, բարձր երաժշտություն այլևս ոչ ոք չի միացնի, ավտոմեքենաների վրա դռիկներ չի տեղադրի և երբ այս ծանր հանցագործները կվերանան, ապա Օսիպյանը ժամանակ կունենա և կզբաղվի՝ սպանություններով, պայթյուններով, զինված հեղաշրջման փորձերով, բնակարանի և ավտոմեքենայի հրկիզումներով, գողություններով, հափշտակություններով և այլ մանր-մունր, մասնավոր գանգատի շրջանակներում գտնվող, թեթև հանցագործություններով: Վանոյի Ժամանակ հեշտ էր, իսկ Օսիպյանի համար՝ դժվար: Հա մի բան էլ՝ Վանոյի ժամանակ ոստիկանը ոստիկան էր և իր գործառույթն էր կատարում, իսկ հիմա ոստիկանը «մերնա», ուղղակի այս տեմպերով արդեն մենք չենք լինի»: