«Քաղբանտարկյալ Ռոբերտ Քոչարյանը երբեք թույլ չի տվել այդպիսի ձևակերպումներ ԼՂ վերաբերյալ». ադրբեջանական մամուլի անդրադարձը՝ Փաշինյանի ելույթին

ՀՀ վարչապետ Նիկոլ Փաշինյանի՝ օգոստոսի 5-ին Ստեփանակերտի Վերածննդի հրապարակում ելույթը լայն արձագանք է գտել Ադրբեջանում: Այդ երկրի լրատվամիջոցները գրել են. «Լեռնային Ղարաբաղի ներկայիս ղեկավարությունը, որը զգալի ներդրում ունի պետականության կայացման գործում, չի ընդունում Փաշինյանի կողմից վարած քաղաքականությունը: Փաշինյանը, գիտակցելով դա, փորձում է հեղափոխության միջոցով նրանց հեռացնել իշխանությունից: Բայց արդյո՞ք նման թեզերը կունենան արցախցիների կողմից աջակցություն, ովքեր կարող են սինը տարբերել ճշմարտությունից: Տարածաշրջանում վտանգավոր իրադարձություններ են հասունանում:
Փաշինյանի կողմից հնչեցրած կետերը խաղաղության գործընթացը ձգձգելու և խաթարելու փորձ են»:

Ըստ Haqqin.az-ի՝ «Փաշինյանի հնչեցրած կետերը ղարաբաղյան կարգավորման հարցում շատ ավելի արմատական և անզիջում են, քան ընդդիմության առաջնորդ Ռոբերտ Քոչարյանի մոտեցումները»: «Հայաստանի նախկին նախագահ, այժմ թիվ 1 քաղբանտարկյալ Ռոբերտ Քոչարյանը, որը ճնշված է Երևանի նոր վարչակարգի կողմից, երբեք թույլ չի տվել այդպիսի չկիրառված և միանշանակ ձևակերպումներ իրականացնել Լեռնային Ղարաբաղի ապագա կարգավիճակի որոշման վերաբերյալ»,- հավելել է լրատվանիջոցը: