ԱԳ նախարարը՝ վարչապետի՝ «Արցախը Հայաստան է և վերջ» հայտարարության մասին

«Վարչապետը խոսում էր հայության առաջնահերթությունների, միասնության և զարգացման, ընդհանուր նպատակների մասին»,- ասաց ՀՀ արտգործնախարար Զ. Մնացականյանը՝ պատասխանելով այն հարցին, թե արդյոք ՀՀ վարչապետի Ստեփանակերտում արած հայտարարությունը, ըստ որի՝ «Արցախը Հայաստան է և վերջ», բարդություններ չի առաջացնի բանակցային գործընթացում:

Ըստ նախարարի՝ այդ հայտարարությունը պետք է դիտարկել ասվածի և շեշտադրումների համատեքստում։ Նա միաժամանակ ընդգծեց, որ հայկական կողմի համար խաղաղ կարգավորումն այլընտրանք չունի։

ԱԳՆ ղեկավարի պնդմամբ՝ շփման գծում իրավիճակի փոփոխությունը Դուշանբեի պայմանավորվածությունների հետևանքն է։

«Անհրաժեշտ է կրճատել սրացման ռիսկերը։ Դա ոչ միակ, բայց անհրաժեշտ նպատակն է այն մթնոլորտի ստեղծման համար, որը նպաստում է խաղաղությանը»,- հիշեցրեց ԱԳ նախարարը։ Նրա խոսքով՝ ուղղակի օպերատիվ կապը, լինելով գործուն մեխանիզմ, ծառայում է այս կամ այն նպատակին։

«Դուշանբե պլյուսը ձեռք բերվածի էլ ավելի ամրապնդումն է։ Բաղկացուցիչ մասերն են՝ ինչպես ամրապնդել կապերը, բարելավել մոնիթորինգների որակը, ներդնել էլ ավելի արդյունավետ գործիքների»,- պնդեց ԱԳ նախարարը։

Այն հարց-դիտարկմանը, թե ինչի՞ համար է բանակցային գործընթացը, երբ սեղանին փաստաթուղթ չկա, և որքա՞ն պետք է տևի առանց փաստաթղթի բանակցելը, Զ. Մնացականյանն ասաց. «Ես չեմ ուզում տպավորություն ստեղծվի, որ եթե թղթով չենք աշխատում, չենք բանակցում: Գործընթացը տևում է տարիներ շարունակ: Այդ ընթացքում ձևավորվել են բազմաթիվ տարբեր պարամետրեր, որոնք իրենց համադրության մեջ կարող են հանդիսանալ ճանապարհ դեպի առաջ: Մեզ համար առաջնայինը այդ պարամետրերի համադրումն է»,- ամփոփեց ԱԳՆ ղեկավարը: