«Ադրբեջանը ՀԱՊԿ-ում որևէ կշիռ չունի». Շավարշ Քոչարյան

ՀՀ ԱԳ փոխնախարար Շավարշ Քոչարյանն այսօր Ազգային ժողովում ներկայացրեց ՀԱՊԿ կանոնադրությունում փոփոխություններ կատարելու մասին երկրորդ արձանագրությունը վավերացնելու մասին նախագիծը:

Ըստ այդմ՝ բարձրագույն խորհրդում ներկայացված են պետությունների ղեկավարները, և քանի որ Հայաստանում տեղի են ունեցել սահմանադրական փոփոխություններ, անհրաժեշտ էր համապատասխան փոփոխություններ իրականացնել, ինչը հնարավորություն կտա, որ Հայաստանը ներկա լինի այնտեղ վարչապետի մակարդակով:

Պատգամավոր Արման Բաբաջանյանը, դիմելով Շ. Քոչարյանին, հայտնեց իր մտահոգությունները.

«ՀԱՊԿ-ում Ադրբեջանը շատ ավելի ծանրակշիռ ազդեցություն ունի, քան Հայաստանը, որ ՀԱՊԿ անդամ է: Արդյոք ծանրութեթև արե՞լ ենք ռիսկերը, և ընդամենը մեր վետոյի իրավունքը կարո՞ղ է խոչընդոտել Ադրբեջանին՝ այս կազմակերպությունում դիտորդի կամ գործընկերոջ կարգավիճակի շնորհմանը»,- հարցրեց պատգամավորը:

ԱԳ փոխնախարարը նշեց, որ ինքնին այդ դիտորդի կարգավիճակն արդեն կա պայմանագրում, իսկ խորհրդարանում այսօր քննարկում, նախագծում, հստակեցնում են պահանջները, և այս դեպքում արդեն պատգամավորի մտավախության աստիճանը պետք է նվազի:

«Ադրբեջանն իրականում ՀԱՊԿ-ում որևէ կշիռ չունի, ինքն ունի անուղղակի ազդեցություն՝ այլ անդամ պետությունների միջոցով, բայց կշիռ չունի: Մենք ոչ թե վետո ենք կիրառում, վետոն ենթադրում է, որ ինչ-որ մեկը որոշում է կայացնում, դու դեմ ես, բայց այստեղ որոշումը կայացվում է համատեղ, այսինքն՝ ցանկացած պետության որևէ կարգավիճակ շնորհելու համար պետք է գանք համատեղ որոշման»,-ասաց նա: