«Ի՞նչ է սա, եթե ոչ ռազմահայրենասիրական շիզոֆրենիա». Կարպիս Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է. «Ինձ թվում է՝ վերջին երկու օրերի իրադարձությունները վերջնականապես բացատրեցին ու հստակ սահմանեցին իմ հորինած տերմինի բովանդակությունը, որն է՝ «ռազմահայրենասիրական շիզոֆրենիա»-ն։

Այսինքն՝ հրապարակային հռետորաբանությամբ բանակը սրբացնել, հասցնել պաշտամունքի ամենաբարձր աստիճանի, բայց ոչ հրապարակային տիրույթում հենց այդ նույն բանակում չարաշահումներ անել։ Կամ պատերազմի մասնակիցներին հերոսի կոչում շնորհել, բայց նրանց համար նախատեսված տները օգտագործել այլ պետքերի համար։ Ի՞նչ է սա, եթե ոչ ռազմահայրենասիրական շիզոֆրենիա։ Եթե անհատն ապրում է երկու տարբեր իրականություններում և այդ իրականությունները հակոտնյա են, ապա վստահաբար նա առողջական լուրջ խնդիրներ ունի։
Մի բան էլ ասեմ՝ հասարակագիտությունը և դրանից ածանցվող հրապարակախոսությունը հաճախ է այլ գիտակարգերից տերմիններ վերցնում՝ փոխելով նախնական նշանակությունն ու նույնիսկ իմաստը։ Օրինակ՝ Քիմիայից, մաթեմատիկայից, կենսաբանությունից, բժշկությունից և այլն։ Այս իմաստով պետք չի շիզոֆրենիան հասկանալ հենց բուն բժշկական բովանդակությամբ։ Այսինքն ճիշտ եմ արել, որ այդ բառը օգտագործել եմ և չեմ պատրաստվում հրաժարվել դրանից՝ իհարկե առանց բուն հիվանդությամբ տառապող մարդկանց վիրավորելու կամ էլ ծաղրելու միտման։
Հ․Գ․Պոլիտկոռեկտության դասեր չկարդալ, ես պոլիտկոռեկտ չեմ»: