«ՀՀ-ն բանակցում է Ավստրալիայում դեսպանատուն բացելու ուղղությամբ». Զոհրաբ Մնացականյան

ՀՀ-ն Ավստրալիայում դեսպանատուն բացելու մտադրություն ունի: Այդ մասին Աժ-կառավարություն հարցուպատասխանի ժամանակ հայտնել է ՀՀ ԱԳ նախարար Զոհրաբ Մնացականյանը:

Վերջերս ՀՀ-ում էին Ավստրալիայի խորհրդարանականները, և այդ երկրի դեպանատուն բացելու ծրագրերի մասին Զ. Մնացականյանին հարց ուղղեց ԱԺ «Իմ քայլը» խմբակցության պատգամավոր Արման Բոշյանը:

Արտաքին քաղաքական գերատեսչության ղեկավարն ասաց, որ դեսպանատուն բացելու շուրջ այժմ բանակցություններ են տարվում: «Ավստրալիայում դեսպանատուն ունենալը ՀՀ նպատակն ու գերակայությունն է: Եվ Ավստրալիան մեր անմիջական գերակա ցանկի մեջ է: Սակայն որպեսզի ավելի հստակ հայտնենք մեր նպատակների ժամանակացուցը, անհրաժեշտ է ավարտել որոշ բանակցություններ մեր գործընկերների հետ, ներառյալ՝ այն գործընկերների, որոնք գտնվում էին ՀՀ-ում, որպեսզի կարողանանք ավելի ողջամիտ ծրագիր ունենալ՝ դեսպանություն բացելու»,- նշեց ԱԳՆ ղեկավարը: Ըստ նրա՝ աշխատելու են դիվանագիտական ներկայացուցչության բացումն անել հնարավորինս արագ ժամկետում: