«Արցախում սև, կեղտոտ փիարն ու հակաքարոզչությունը լայն թափ են առել». Գեղամ Բաղդասարյան

Ստեփանակերտի մամուլի ակումբի նախագահ Գեղամ Բաղդասարյանը ֆեյսբուքյան իր էջում գրել է. «Արցախում բուն ընտրական գործընթացներին բավականին ժամանակ կա, բայց սև, կեղտոտ փիարն ու հակաքարոզչությունն արդեն լայն թափ են առել։ Այս առնչությամբ կուզեի դիմել իմ համերկրացիներին։ Սիրելի արցախցիներ, այս կեղտոտ արշավը հիմնականում իրականացնում են ֆեյքեր (կեղծ օգտատերեր), կեղծանուններով կամ անանուն աղբյուրներ, ավելի հասկանալի ասած՝ կենդանի «անոնիմկաներ»։ Հակաքարոզչության ու ապատեղեկատվության այս անազնիվ ու կեղտոտ արշավից անմասն մնալու համար մի խորհուրդ տամ, որ կարող է օգտակար լինել ձեզ։ Հայրս, որ Արցախի 20-րդ դարի լավագույն ուսուցիչ կոչումն ունի, որևէ մարդու մասին խոսք գնալիս անմիջապես հարցնում էր՝ «տակռեն հուվե՞ր ըն»։ Ինչ եմ ուզում ասել՝ ուշադիր նայեք այդ արշավն իրականացնողներին, մի խաբվեք նրանց ֆեյսբուքյան էջի պատահական կենտ լուսանկարով։ Իրական օգտատերերը զավակներ, հարազատներ, բարեկամներ ու գործընկերներ են ունենում, որոնք ֆեյսբուքյան էջերում պարբերաբար կապի մեջ են լինում նրանց հետ՝ ծնունդ են շնորհավորում, զավակների ու բարեկամների ուրախությամբ ուրախանում ու տխրությունը կիսում։ Նրանցից հաստատ ոմանց կճանաչեք, կամ լսած կլինեք նրանց մասին։ Իսկ եթե այս ամենը չկա, և օգտատերը միանգամայն անծանոթ մարդ է՝ առանց «տակռեների» մասին բավարար տեղեկատվության, ապա մի վստահեք նրանց։ Եթե նրանք խորշում են իրենց իրական դեմքերից ու արմատներից, ապա նրանց նկատմամբ ձեր խորշանքի ու արհամարհանքի եռապատկման համար բոլոր հիմքերը կան։ Ի վերջո, առօրյա կյանքում մարդ ի՞նչ է անում գարշահոտության հանդիպելիս։ Ճիշտ է, քիթը բռնում է ու հեռու գնում»: