«Հերթն առաջիկայում կհասնի նաև Սերժ Սարգսյանին»․ Սեդա Սաֆարյան

«Մարտի 1-ի» գործով տուժողներից մեկի պաշտպան, փաստաբան Սեդա Սաֆարյանը, Factor.am-ի եթերում անդրադառնալով ՀՀ նախկին գլխավոր դատախազ Գևորգ Կոստանյանի ներգրավմանը «Մարտի 1-ի» գործով, ասել է, որ դրանով գնահատական կտրվի յուրաքանչյուրի դերակատարությանը գործը կոծկելու հարցում, և կամբողջանա Ռոբերտ Քոչարյանի մեղադրանքը։

«Պատկերացում կկազմենք նաև, թե Սերժ Սարգսյանի վարչակազմը մարտի 1-ին ու մարտի 1-ից հետո ինչով է զբաղվել: Կարծում եմ, որ դա ազդող կլինի՝ հետագայում Սերժ Սարգսյանի արարքին գնահատական տալու առումով, որովհետև շատ հանգամանքներ միմյանց հետ անմիջական կապ ունեն: Հանցագործության պատկերի ամբողջացման համար շատ կարևոր է, որ հասկանանք՝ ինչու Մարտի 1-ը չբացահայտվեց»,- ասել է Սաֆարյանը:

Նախկին ոստիկանապետ Ալիկ Սարգսյանին ներկայացված մեղադրանքում առկա էր նաև Գևորգ Կոստանյանի անունը, որ նա՝ որպես այդ ժամանակվա ՄԻԵԴ ներկայացուցիչ, մասնակցել է փաստեր կոծկելուն և հանցագործությունը պարտակելուն։ Այս առնչությամբ Սաֆարյանն ասել է. «Այն ժամանակ ցուցմունք տալու համար Փաստահավաք խումբ գնացած սպաներից շատերը մինչ այդ մտել են նախագահական, ինստրուկտաժ են եղել, թե որ հարցերին ինչպես պիտի պատասխանեն։ Ըստ էության՝ ինստրուկտաժը եղել է զորքի մասնակցությունը բացառելու ուղղությամբ»,- նշեց փաստաբանը և հավելեց. «Անձինք պատասխանել են, թե կոնկրետ որտեղ, ինչ հանգամանքներում, ում կողմից են իրենց այդ ինստրուկտաժներն արվել։ Կոնկրետ ասել են, որ նախագահականում է արվել և ով է արել, և այս կարգի ապացույցներն առկա են: Կարծում եմ՝ առաջիկայում կլինեն այդ առթիվ հրապարակումներ»:

Հարցին, թե Սերժ Սարգսյանի անունը շրջանառվե՞լ է, Սաֆարյանը պատասխանել է. «Բնականաբար, այդ ժամանակ առանց նախագահի գիտության ոչ ոք չէր կարող նախագահականում հակաօրինական գործողություն իրականացնել։ Եվ գտնում եմ, որ այս հարցերին պատասխան տալու հերթն առաջիկայում կհասնի նաև 3-րդ նախագահին»:

Մանրամասները՝ տեսանյութում: