«Ո՞նց համաձայնեցիք գնալ նման գործարքի». Լուսինե Հարոյան

«Ազգային Համաձայնության» համանախագահ Լուսինե Հարոյանը ֆեյսբուքյան իր էջում գրել է. «Պարոն Նիկոլ Փաշինյան, մի օր մենք դեմ առ դեմ ենք դուրս գալու, և ես ձեզ հարց եմ տալու, և դուք պատասխանելու եք իմ հարցին:
Հարց եմ տալու, թե ինչո՞ւ եք օրինականացրել կոռուպցիան, ինչո՞ւ եք երկրի բյուջեն թալանում ձեր անձնական կարիքների, ձեր տհաս թիմի պարգևավճարների ու վոյաժների համար, որտեղից, ի դեպ, դուք 0 արդյունքով եք վերադառնում, թե մինչև ե՞րբ եք ստելու ու կեղծելու:
Հարց եմ տալու, թե ինչո՞ւ սեփականաշնորհեցիք օրենսդիր, գործադիր ու դատական համակարգը, թե ինչո՞ւ չեք փոխում երկիրը ծվատող համակարգի շահերի պաշտպան սահմանադրությունը:
Հարց եմ տալու, թե ինչո՞ւ խաբեցիք ու «գցեցիք» մի ամբողջ ժողովրդի, ո՞նց համաձայնեցիք գնալ նման գործարքի, ո՞նց եք գիշերը քնում:

Ու Դուք պատասխանելու եք ինձ, պիտի պատասխան տաք մարդկանց, որ հավատացել ու աջակցել են ձեզ:
Պիտի պատասխան տաք ինձ այն ապրումների համար, երբ ընկած լուրերի պատառիկներն էի որսում, երբ ձեզ իբր «կալանավորեցին» ու շարժումը պիտի մարեր:
Պիտի պատասխան տաք ինձ այն հույսի համար, որ ունեի, իբր թե Հայաստանը վերջապես կազատվի իրեն ծվատող հանցագործ վարչախմբից ու կհաստատվի արդար սոցիալ-տնտեսական համակարգ, հույս, որ ի դերև ելավ:
Պիտի պատասխան տաք ինձ այն գիշերների համար, երբ նստում, անգլերենով նամակներ էի գրում ու ֆեյսբուքով ուղարկում դրսում ապրող հայ հայտնիներին՝ կոչ անելով գալ ու աջակցել ձեզ ու թույլ չտալ, որ շարժումը մարի:
Պիտի պատասխան տաք, թե ինչո՞ւ են հենց Ձեր իշխանության ամիսներին ռուսաստաններն ու եվրոպաները շարունակ հայտարարում, որ Արցախի հարցում դրական տեղաշարժեր են սպասվում, այդ ի՞նչ եք պայմանավորվել մեր մեջքի ետևում, էլի թաքուն:
Պիտի պատասխան տաք, թե ինչո՞ւ եք բուծում «շարիկովներ» ու խրախուսում այն տգետ ու նողկալի տեսակը, որոնք անգամ հայոց այբուբենը չգիտեն, բայց ձեզ թթու խոսք ասողներին հոշոտում են, թուրք ու ծախված անվանում, «կնանիքի» այն տեսակը, որ մտնում, «քֆուր» են գրում, հենց «քֆուր», ոչ թե հայհոյանք: Գիտե՞ք, երկրի ղեկավարը ու ընդհանրապես ցանկացած ադեկվատ մարդ պիտի ամոթից գետինը մտներ աջակիցների նման բանակ ունենալու համար:

Ու դուք պատասխանը տալու եք առարկայական, կոնկրետ:
Հանկարծ չկարծեք, թե ես ձեր պողոսներից եմ, ու ձեզ կհաջողվի ձեր թերի կրթությամբ ու «մուտիլովկեքով» տակից դուրս գալ»: