«Արցախի վարչախումբը պարտավոր է տառացիորեն կրկնել Երևանի բոլոր քայլերը». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Ստեփանակերտի կառավարիչներն իրենց պահում են Բաքվի գործակալների պես: Հասունացել է պահը՝ իրենց համար կողմնորոշվելու. Արցախը Հայաստան է ու վերջ, թե՞ իրենք ոչ թե Երևանի օրինակին են հետևելու, այլ՝ սպասելու են տեսնեն թե ինչ է անում Բաքուն, որ նոր գործեն:

Հայաստանի ողջ տարածքում արտակարգ դրություն է: Համաճարակը Հայաստանի ներսում է, այդ թվում և այդ ամենը վերաբերում է Արցախին: Ի՞նչ են մտածում Ստեփանակերտում. որ Հայաստանի մյուս մարզերում մարդիկ զգույշ են լինելու, ապրելու են համաձայն արտակարգ իրավիճակի կանոնների և փորձելու են կանխել վարակի տարածումը, իսկ Արցախի հատվածում ազատ տեղաշարժվելու են, ինչ-որ քարոզարշավներ անցկացնեն և վարակն ավելի ու ավելի տարածեն՝ այդ թվում վտանգելով պաշտոնական Երևանի բոլոր ջանքերը՝ պայքարելու համաճարակի դեմ: Եվ արդյո՞ք այդքան անտարբեր են արցախցիների և մնացած հայաստանցիների առողջության նկատմամբ: Ստացվում է, որ ստեփանակերտյան նեղ վարչախումբը՝ իր հանցավոր անգործությամբ սպառնալիք է դառնում ողջ Հայաստանի համար:

Եվս մեկ և արդեն գործնական ու շատ հստակ ապացույց այն բանի, որ Արցախի անկախությունը մեծ սպառնալիք է ողջ Հայաստանի անվտանգությանը: Արցախը Հայաստանի մաս է ու այնտեղի վարչախումբը պարտավոր է այս ծայրահեղ իրավիճակում ոչ թե անկախ գործել Երևանից, այլ՝ տառացիորեն կրկնել Երևանի բոլոր քայլերը»: