«Իրականում Դուք փայլուն մանիպուլյատոր եք». Սուրեն Գրիգորյանը՝ Էդմոն Մարուքյանին

«Իմ քայլը» խմբակցության պատգամավոր Սուրեն Գրիգորյանը պատասխանեց ԼՀԿ խմբակցության ղեկավար Էդմոն Մարուքյանի՝ իշխող խմբակցությանը տրված գնահատականին, թե իշխանությունն իրենց ներկայացրած նախագիծը մեկնաբանում է այնպես, ինչպես դա ժամանակին անում էր Արդարադատության նախկին նախարար Հրայր Թովմասյանը:
«Այսօր Արման Աբովյանն ինձ ասաց, որ փայլուն իրավաբան եմ, ես էլ շարունակեմ կոմպլիմենտները: Պարո՛ն Մարուքյան, դուք էլ փայլուն մանիպուլյատոր եք իրականում: Այդպես փայլուն մանիպուլացնել՝ երկրորդ քաղաքական գործչի տրված չէ»,- հայտարարեց Ս. Գրիգորյանը և ներկայացրեց մի դրվագ՝ նախագիծը իրավական հարցերի հանձնաժողով բերելու գործընթացից:
Ըստ նրա՝ ԼՀԿ ներկայացուցիչը փետրվարին օրինագիծը ներկայացնելիս ասել է, թե օրինագծում խոսվում է ձերբակալված և կալանավորված անձանց մեկուսի տեսակցության մասին: Դրանից հետո կառավարությունը բերել է առաջարկ, որ պատգամավորը կարող է մտնել ցանկացած խուց, հաղորդակցվել այնտեղ գտնվող անձանց հետ, եթե ցանկանա մեկուսի տեսակցել, դիմի քննիչին: Քննիչը մերժի դա միայն պատճառաբանված որոշմամբ:
«Դուք ասացիք՝ ոչ, մերժեցիք այդ առաջարկը: Դրանից հետո դուրս եք եկել ու այս ամբիոնից ասում եք՝ տեսակցելու մասին չէ խոսքը: Բա եթե տեսակցելու մասին չէ խոսքը, ինչո՞ւ եք տեսակցություն նախատեսող 15-րդ հոդվածում փոփոխություն անելու նախագիծ բերում: Եվ հիմա դա փորձում եք ներկայացնել այնպես, թե «Իմ քայլը» նույն մեկնաբանության կրողն է»,- ամփոփեց իշխանական պատգամավորը: