«Լավրովի հայտարարությանը Մնացականյանը պատասխանում է, որ փուլայինին էլ մեծ հաշվով դեմ չենք». Կ. Վրթանեսյան

Ռազմական հարցերով փորձագետ Կարեն Վրթանեսյանը ֆեյսբուքյան իր էջում գրել է. «Զոհրաբ Մնացականյանն, ըստ էության, հաստատեց, որ ընկել ենք «փուլային ծուղակ»։

Ասում է. «Հայկական կողմի համար չափազանց էական է ձևավորել Ղարաբաղյան հարցի փաթեթային շրջանակ, որտեղ երկու կողմերի պարտավորությունները համադրելի և վերահսկելի են»:

Նշանակում է, որ բանակցային գործընթացի այս փուլում հայկական կողմը չունի «ձևավորած փաթեթային շրջանակ»։

Դեռ նոր պիտի ձևավորեն։

Երկրորդը. Փուլային լուծումն, ըստ նախարարի, հնարավոր է, սակայն դրա շրջանակում բոլոր կողմերի քայլերը պետք է համապատասխան լինեն։

Եթե նախկինում հայկական կողմը միշտ պնդում էր, որ փուլային տարբերակը բացառվում է, ապա հիմա Զոհրաբ Մնացականյանը պնդում է, որ փուլային ինչ-որ տարբերակ ընդունելի է։

Ստացվում է, որ Լավրովի հայտարարությանը, թե սեղանին դրված է փուլային փաստաթուղթ, ՀՀ արտաքին գործերի նախարարը պատասխանում է, որ փուլայինին էլ մեծ հաշվով դեմ չենք։ Վարագույր»: