«Սպառնալիքի լեզուն ժխտված է, բանակցային լեզուն՝ ընդունված». Զոհրաբ Մնացականյան

ՀՀ ԱԳ նախարար Զոհրաբ Մնացականյանն ԱԺ արտաքին հարաբերությունների մշտական հանձնաժողովի նիստում անդրադարձել է Արցախյան հակամարտության կարգավորման գործընթացին և ՌԴ արտգործնախարար Լավրովի հայտարարությանը՝ փուլային տարբերակի վերաբերյալ:

«2019-ի ընթացքում համանախագահների ներգրավմամբ բավական ծանր աշխատանք է եղել: Սկզբունքորեն, մենք բավական թափանցիկ խոսել ենք այն ծավալի մեջ, որը հնարավոր է: Մենք միշտ խոսել ենք, որ հարցը հիմնվում է փոխզիջման սկզբունքի վրա: Չի կարող որևէ մեկը սպասել, որ Հայաստանը որևէ քայլ կատարի, որը համադրելի չէ, որը ենթադրում է զիջում, և որը վնասում է մեր ազգային անվտանգությանը: Այստեղ ուղղակի շատ էական է լինել սառնասիրտ և հանգիստ: Իհարկե, շատ հետաքրքիր է ներքին դաշտում՝ քաղաքական կոնտեքստը հաշվի առնելով շատ գունավոր ձևերով արտահայտվել: Բայց այն, ինչն ասում ենք, ավելի քան հստակ է և ավելի քան ուղղորդում է մեր ներգրավումը բանակցային դաշտում»,- նշեց նախարարը:

Մնացականյանը հայտնեց, որ Հայաստանի դիրքորոշումը հիմնված է մեկ կարևորագույն սկզբունքի վրա՝ համազգային կոնսենսուսի. «Այստեղ շատ էական է մի բան. մենք կտրականապես ժխտել ենք բանակցային գործընթացում սպառնալիքի գործոնը: Այսինքն՝ սպառնալիքի լեզուն ժխտված է: Բանակցային լեզուն՝ ընդունված: Այդ բանակցությունների մեջ գոյություն ունեն այն սկզբունքները, որոնց մասին մենք միշտ խոսել ենք»,- նշեց Մնացականյանը: