«Բժշկական գաղտնիք հրապարակելը պատժելի արարք է․ Արսեն Թորոսյանը չի կարող բժիշկ կոչվել». Կարեն Վարդանյան

Համացանցն ակտիվորեն քննարկում է Առողջապահության նախարար Արսեն Թորոսյանի՝ Առաջատար տեխնոլոգիական ձեռնարկությունների միության (ԱՏՁՄ) գործադիր տնօրեն Կարեն Վարդանյանի հայտարարության վերաբերյալ ֆեյսբուքյան գրառումը:

Հիշեցնենք, որ Կ. Վարդանյանն «Առաջին լրատվական»-ին տված հարցազրույցում հայտարարել էր. «Կորոնավիրուսը համաշխարհային մեծ բլեֆ է: Եկել է վակցինա ծախելու ժամանակը»: Դրան արձագանքել էր նախարար Արսեն Թորոսյանը:

«Շատ եմ ցանկանում, որ պարոն Կարեն Վարդանյանը հանկարծ չվարակվի կորոնավիրուսային հիվանդությամբ, քանի որ հաշվի առնելով վերջինիս քրոնիկական հիվանդությունները, չի բացառվում հիվանդության խիստ բացասական ելքը»,- գրել էր նախարարը:
Հիվանդությունների մասին հիշատակումը սոցցանցային հանրությունը ոչ կոռեկտ, բժշկական գաղտնիքը ոտնատակ տալ համարեց:
ԱՏՁՄ գործադիր տնօրեն Կարեն Վարդանյանը MAMUL.am-ի թղթակցի հետ զրույցում ասաց, որ թեպետ բժշկական գաղտնիք հրապարակելը պատժելի արարք է, սակայն ինքը հարցն իրավական հարթություն տեղափոխելու մտադրություն չունի:
«Արսեն Թորոսյանն ուղղակի ապացուցեց, որ չի կարող նախարար լինել, բժիշկ կոչվել: Իր գործատուն՝ վարչապետը թող մտածի, որ իր աշխատակիցը՝ Կառավարության անդամը ցածր որակ է ցույց տալիս: Եթե ինքը շարունակում է աշխատել այդ մարդու հետ, ուրեմն՝ համաձայն է այդ ցածր չափանիշների հետ»,- ասաց Վարդանյանը:

Նա պնդեց, որ ինքը պատրաստ է ապացուցել իր ասածը. «Ես պատրաստ եմ գնալ Նորքի հիվանդանոց, որտեղ պառկած են կորոնավիրուսով հիվանդները և նրանցից ցանկացածի հետ ողջագուրվել: Այդ մարդիկ ուրիշ հիվանդություններով են պառկած»,- պնդեց ԱՏՁՄ տնօրենը: Նա նկատեց, որ ինքը նորություն չի ասել. «Դեռ 200 տարի առաջ, երբ նոր էր ստեղծվում լիբերալիզմը, կար Թոմաս Մալթուս անունով գիտնական: Նա ասում էր, որ բնակչությունը պետք է կտրուկ կրճատել: Եվ դա կոչվում էր մալթուսականություն: Նրանք ամեն կերպ աշխարհը խարխլել են, հիմա սա նրանց վերջին հարձակումն է: Կհաջողեն, թե՝ ոչ, չեմ կարող ասել: Այդ նույն գաղափարախոսությունը կրող Բիլ Գեյթսը 3-4 ամիս առաջ համաշխարհային ֆորումում ասել էր, թե կորոնավիրուսից ինչ պանդեմիա է լինելու, և 2 միլիոնից ավելի մարդ է մահանալու: Ակնհայտ է, որ պլանավորում են: Այսօր ո՞վ չգիտի, որ խոշոր դեղագործական ձեռնարկությունները որոշ բժիշկների պարգևավճար են տալիս իրենց դեղերն օգտագործելու համար»,- ամփոփեց Կ. Վարդանյանը: