«Ալիևը կազմակերպում է նացիստական ռեժիմի ադրբեջանցի աջակցի փառաբանում և ներկայանում որպես նացիզմի հակառակորդ». Ն․ Փաշինյան

Մամուլի ասուլիսում ՀՀ վարչապետ Նիկոլ Փաշինյանը փաստերով հակադարձեց Ադրբեջանի նախագահ Իլհամ Ալիևի հայտարարություններին․

«Փաստական տվյալների հիման վրա Երկրորդ համաշխարհայինի տարիներին մոտավորապես 75 հազար ադրբեջանցի ներգրավված է եղել նացիստական լեգեոներական խմբավորումներում: Գոյություն է ունեցել ադրբեջանական լեգեոն, որն ունեցել է դրա համար անհրաժեշտ բոլոր ատրիբուտները՝ սկսած հագուստից»,- ասաց ՀՀ վարչապետը՝ ցուցադրելով արխիվային լուսանկարներ։

Նա հայտնեց նաև, որ Երկրորդ համաշխարհային պատերազմի տարիներին Գերմանիայում լույս է տեսել ադրբեջանական լեգեոներական պաշտոնաթերթը:

«Ինչպե՞ս կարելի է ներկայանալ որպես նացիզմի հակառակորդ և նացիզմի կողմնակից լինելու մեջ մեղադրել ՀՀ-ին, երբ Ադրբեջանում անձամբ Իլհամ Ալիևը կազմակերպում է նացիստական ռեժիմի ադրբեջանցի աջակցի փառաբանումն իր երկրում, իսկ արտաքին աշխարհում փորձում է ներկայանալ որպես նացիզմի հակառակորդ: Սա ուղղակի անընդունելի է»։