«Վարչապետի մի շարք մտքեր խորը մտահոգությունների տեղիք են տալիս». Ռոբերտ Ղևոնդյան

Քաղաքագետ Ռոբերտ Ղևոնդյանը ֆեյսբուքյան իր էջում գրել է. «Ինչպես և կանխատեսել էի, ի վերջո իշխանությունը ընդունեց, որ ՍԴ ճգնաժամը չի կարող «սպասել» կորոնավիրուսի ավարտին և կգնա այլ ճանապարհով խնդրի լուծմանը։ Սակայն վարչապետի մի շարք մտքեր խորը մտահոգությունների տեղիք են տալիս։

Առաջին հերթին անսպասելի է և անհասկանալի «2023-ին խորհրդարանականի հետ սահմանադարական փոփոխություններ» իրականացնելու միտքը, քանի որ «կայուն մեծամասնության» անհեթեթ ու հակաժողովրդական դրույթով 2023թ․ ևս մեկ անգամ խորհրդարանական ընտրությունների անցկացումը հղի է պետականության համար կորստաբեր հետևանքներով․․․

Եթե 2023 թվականի հերթական ընտրություններին ևս մեկ անգամ մոտենանք «կայուն մեծամասնության» և «ռեյտինգային քվեարկության» խայտառակություններով, ապա կարող ենք ասել, որ այս իշխանությունը գործում է նախկինի պես՝ «օրենքը փոխենք, բայց այնպես, որ մեզ վրա չտարածվի» սկզբունքով, ինչն ուղղակի հակոտնյա է հեղափոխության արժեքային համակարգին, որի համար մեր ժողովրդի մեծ մասը դուրս էր եկել փողոց․․․»: