«Դա ոչ թե պետք է լինի հայտարարություն՝ տապալման մասին, այլ՝ փաստարկ և հիմնավորում». փոխվարչապետ

Այսօր լրագրողների հետ զրույցում մեկնաբանելով «Բարգավաճ Հայաստան» խմբակցության ղեկավար Գագիկ Ծառուկյանի հայտարարությունը, թե կառավարությունը տապալել է կորոնավիրուսի դեմ պայքարը և աջակցության ծրագրերը նույնպես թիրախային չեն, քանի որ չեն ընդգրկում ամբողջ ծավալը, փոխվարչապետ Մհեր Գրիգորյանն ասել է, որ համաձայն չէ այդ կարծիքի հետ. «Կարծում եմ՝ այն արագությամբ և ինտենսիվությամբ, որով մենք իրականացրեցինք սոցիալ-տնտեսական օժանդակության ծրագրերը, շատ տպավորիչ են, և եթե համեմատում ենք այլ երկրների միջոցառումների հետ, տեսնում ենք, որ բավականին արդյունավետ միջոցառումներ են իրականացվել: Երկրորդ՝ երբ որ ընդդիմությունը խոսում է ինչ-որ բանի տապալման մասին, ոչ թե դա պետք է լինի հայտարարություն՝ տապալման մասին, այլ՝ փաստարկ և հիմնավորում, որպեսզի դառնա ողջամիտ»:

Պատասխանելով հարցին, թե ԲՀԿ-ն ասում է, որ կառավարությունը պետք է փոխվի, Մ. Գրիգորյանն ասել է. «Եթե նրանց հայտարարությունների մասով լինեն հիմնավոր փաստեր, կքննարկենք, բայց բուն հայտարարությունը չի կարող լինել դիսկուսի առարկա, որովհետև դա միայն հայտարարություն է, որի պատասխանը կարող է լինել միայն՝ ոչ»։