ՏԿԵ նախարարը հանձնարարականներ է տվել ՏԻՄ-երին և տարածքային մարմինների ղեկավարներին

ՀՀ Տարածքային կառավարման և ենթակառուցվածքների նախարար Սուրեն Պապիկյանն այսօր՝ ճեպազրույցի ժամանակ անդրադարձավ համակավարակի շրջանում իրականացվող բազմամարդ միջոցառումների խնդրին, այդ թվում՝ հուղարկավորություններին, հարսանիքներին:

«Սա մեծ խնդիր է վարակի տարածման համար, ու մեր հանրության զգալի հատվածը շարունակում է խնդրին վերաբերվել զգացմունքայնությամբ: Խնդրում եմ պարզապես հաշվի առնել այն հանգամանքը, որ յուրաքանչյուրիս գործողությամբ կարող են փրկվել կյանքեր և յուրաքնաչյուրիս անգործությամբ կարող են արձանագրվել մահեր»,- ասաց նա:

Նախարարը ճեպազրույցի ժամանակ հայտնեց, նաև, որ տարածքային մարմինների ղեկավարներին և տեղական ինքնակառավարման մարմիններին տրվել են հանձնարարականներ, որ վերջինները համայնքներում հանդիսանան պատասխանատուն հավաքույթները պարետի կողմից որոշված քանակից ավել թույլ չտալու համար: «Արգելքով չէ, որ միայն պետք է կարողանանք հաղթահարել սա. մեզ պետք է հանրային բարձ գիտակցություն և դրա սերմանումը կախված է յուրաքանչյուրիցս»,- ասաց Պապիկյանը: