«Թաղապետը 150 տոկոս պարգևավճար է ստացել»․ Արաբկիրի թաղապետարանի աշխատակիցների բողոքը

183

Հինգշաբթի, 16 հուլիսի, 2020 թ., 16:10

Այսօր՝ հուլիսի 16-ին, Արաբկիրի թաղապետարանի մի շարք աշխատակիցներ բողոքի ակցիա են իրականացրել թաղապետարանի առջև: Աշխատակիցների խոսքով իրենք ստացել են 15-20 տոկոս եռամսյակային պարգևավճար, իսկ վարչական շրջանի ղեկավար Արամ Դանիելյանը պարգևատրվել է աշխատավարձի 150 տոկոսի չափով։

Նրանք հանդիպել են թաղապետին, սակայն քննարկումը չի ստացվել և վրդոված դուրս են եկել այնտեղից՝ լրագրողներին առանց որևէ պարզաբանում տալու։

«Պարգևավճարների գաղափարը ճիշտ կիրառելու համար պետք է տարբերակված մոտեցում ցույց տալ։ Երբ որ սկսում ենք տարբերակված մոտեցում ցույց տալ, աշխատակիցը, համեմատելով մյուս աշխատողների կամ այլ վարչական շրջանների ՏԻՄ ներկայացուցչի հետ, ունենում է իր մոտ որոշակի դիսբալանս և դժգոհություններ»,- լրագրողների հետ զրույցում ասել է Արաբկիրի թաղապետը։

Արամ Դանիելյանի խոսքով՝ այս ժամանակահատվածի համար, ելնելով օբյեկտիվ և սուբյեկտիվ պատճառներից, 83 տոկոս կատարողական է ապահովվել։

«Ես գտնում եմ, որ բոլոր աշխատակիցներն աշխատավարձն ստացել են 100 տոկոսով»,- հավելել է Դանիելյանը։

«Ակցիայի մասնակիցները նշում են, որ Դուք 150 տոկոս պարգևավճար եք ստացել, իսկ իրենք չեն ստացել»,- նկատեց լրագրողներից մեկը։ «Հարգելինե՛րս, թաղապետի պարգևավճարը թաղապետը չի նշանակում։ Այն թաղապետի վերադասն է նշանակում՝ գնահատելով աշխատանքը։ Այս մասով ես մեկնաբանություն չեմ կարող տալ»,- նշել է Դանիելյանը։