«Ձեր անձնական տպավորութունն ինչպիսի՞ն է Խունդկարյանի վերաբերյալ». լրագրողը՝ Մակունցին

Այսօր «Իմ քայլը» հանդիպել է ՍԴ դատավորի թեկնածու Երվանդ Խունդկարյանի հետ:

«Պատգամավորներն ուղղել են բոլոր իրենց հուզող հարցերը, ինչպես նաև հանրության շրջանում շրջանառվող որոշակի շեշտադրումներ, որոնք արծարծվել են մամուլում»,- այս մասին դռնփակ հանդիպումից հետո ասաց ԱԺ «Իմ քայլը» խմբակցության ղեկավար Լիլիթ Մակունցը՝ նշելով, որ խմբակցության ոչ բոլոր անդամներն են ներկա եղել:

Հարցին, թե ինչպես էր անցել Վահրամ Ավետիսյանի հետ հանդիպումը, որն անհնար էր համարում 80 ձայն ստանալը, Մակունցը պատասխանեց, որ հանդիպումն անցել է այն մթնոլորտում, ինչ, սովորաբար, մյուս թեկնածուների հետ:

«Հնչում են տարբեր հարցեր, այդ թվում կարող են լինել և սուր հարցեր, որոնք և հնչել են... հավանաբար դա էր պատճառը, որ առանձին պատգամավորների հարցադրումներից պարոն Ավետիսյանի մոտ կար այդպիսի տպավորություն»,- նման հետևություն արեց «Իմ քայլը» խմբակցության ղեկավարը:

Հարցին, թե Մակունցի անձնական և խմբակցության ընդհանուր տրամադրությունն ինչպիսին է եղել Խունդկարյանի վերաբերյալ, «Իմ քայլը» խմբակցության ղեկավարը պատասխանեց, որ ինքը հարց չի ուղղել և իր տպավորությունների արդյունքը կհայտնի փակ քվեարկությամբ, իսկ ընդհանուր տրամադրությունների վերաբերյալ քննարկումներ չեն եղել: