«Թուրքիան երբեք չի հրաժարվի իր հակահայկական կեցվածքից». Արման Աբովյան

ԱԺ ԲՀԿ-ական պատգամավոր Արման Աբովյանը ֆեյսբուքյան իր էջում գրել է․ «Հաճախակի հանդիպում եմ մի կարծիք, որ պետք է «բարելավել» հարաբերությունները Թուրքիայի հետ և հետևաբար, հարաբերությունների շտկումը նրանց հետ, մեզ համար կլինի տնտեսական «մանանա», որը իսկույն կդարձնի մեզ բոլորիս «չաղ ու բախտավոր»։

Ուրեմն՝ ի սկզբանե ասեմ, որ մարդիկ, որոնք պնդում են այս տեսակետը կա՛մ բացարձակ չեն հասկանում մեր և թուրքերի հակասությունների պատճառահետևանքային երանգները, կա՛մ կատարում են հստակ պատվեր հայկական հասարակության մեջ թուրքամետ ապատեղեկատվություն տարածելով։

Տեսեք...

1. Հենց Թուրքիայի քաղաքական վերնախավն է, որ մշտապես ձեռնարկել և շարունակում է ձեռնարկել հակահայկական քաղաքականություն։
Օրինակ, հենց Թուրքիան է փակել սահմանը մեր հետ, հենց թուրքական քարոզչամեքենան է ներկայացնում մեզ՝ որպես թշնամի։

Հենց Թուրքիան է, որ Հայաստանի անկախությունրց ի վեր, ձեռնարկում է դիվանագիտական հակահայկական քաղաքականություն բոլոր հնարավոր միջազգային հարթակներում։

2. Թուրքիան մշտապես ընդգծել է, որ բացի քաղաքական և դիվանագիտական գործիքակազմից, պատրաստ է նաև ռազմական ճնշում գործադրել Հայաստանի և Արցախի ուղղությամբ, գործնականում ապահովելով ռազմական տարատեսակ աջակցությամբ իր «պստիկ եղբայր» Ադրբեջանին։

3. Թուրքիան է, որ բոլոր առիթներով հերքում է իր ցեղասպան կերպարը և հրաժարվում է ընդունել իր մեղքը մեր դեմ, դրանով փաստացի ցուց տալով, որ չի զղջալու իր հանցագործությունների համար մեր նկատմամբ։

4. Վերջին շրջանում հենց թուրքերն են լարում տարածաշրջանում հակահայկական տրամադրություները և ագրեսիվ կերպով սպառնում մեզ։

Օրինակ, Թուրքիայի պաշտպանության նախարարը միայն վերջին ամսվա ընթացքում մի քանի անգամ ընդծել է, որ պատրաստ է բոլոր իր ռեսուրսներն օգտագործել, որպեսզի օգնի Ադրբեջանին վերսկսել Հայսատանի և Արցախի դեմ ռազմական գործողությունները։

5. Եվ ամենակարևորը, Թուրքիայի ատելությունը դեպի մեզ, ունի իրենց տեսանկյունից ռացիոնալ բացատրություն, քանզի Թուրքիայի հիմնական նպատակն է այս կամ այն կերպ Հայաստանի և Արցախի տարածաշրջանային գործոնի վերացումը, որ, ի վերջո, իրականա «Մեծ Թուրանի» նախագիծը։

Ուշադրություն դարձրեք մի շատ կարևոր փաստի։
Կապ չունի, որ ուժն է իշխում Թուրքիայում՝ աշխարհիկ դեմոկրատները, թե՞ նեոօսմանական ֆանատիկները։
Իրենց բոլորին միավորում է հակահայկական քայլերի հետևողական քաղաքականությունը։

Հասկացեք, օ՜ իմ «խաղաղասեր» համաքաղաքացիներ, Թուրքիան երբեք չի հրաժարվի իր հակահայկական կեցվածքից, քանզի Թուրքիայի քաղաքական վերնախավը լուծում է ոչ թե լոկալ ազգայնական խնդիրներ, այլ իրագործում է ավելի գլոբալ պանթուրանական նախագիծ, որի հաջող իրականացման գրավական է հանդիսանում Հայաստանի և Արցախի «հեռացումը» տարածաշրջանային քարտեզից։

Այնպես որ, պետք չէ զբաղվել ինքնասպան մազոխիզմով, փորձելով «հարաբերություններ» շտկել Թուրքիայի հետ։
Դա իսպառ անհնար է»։