Չորեքշաբթի, 30 սեպտեմբերի, 2020 թ.
|
Ստեփանակերտում`   +8 °C

Մոսկվան և Մինսկը քննարկում են Բելառուսի պարտքի վերաֆինանսավորման հարցը

Մոսկվան և Մինսկը քննարկում են Բելառուսի պարտքի վերաֆինանսավորման հարցը
409
Չորեքշաբթի, 02 սեպտեմբերի, 2020 թ., 18:45

Մոսկվան և Մինսկը քննարկում են 1 մլրդ դոլարի չափով բելառուսական պետական պարտքի մի մասի վերաֆինանսավորման հարցը: «Մենք բանակցություններ ենք վարում ֆինանսների նախարարությունների մակարդակով, և մեր ղեկավարներն այդ մասին նույնպես բանակցություններ են վարել։ Մենք, ընդհանուր առմամբ, կբանակցենք մեր բելառուսական գործընկերների հետ վարկի տրամադրման շուրջ»,- ասել է Ռուսաստանի ֆինանսների նախարար Անտոն Սիլուանովը՝ պատասխանելով այն հարցին, թե արդյոք Բելառուսից պարտքի վերակազմավորման հարցում է ստացվել։
Բելառուսի նախագահ Ալեքսանդր Լուկաշենկոն օգոստոսի 27-ին հայտարարել է, որ երկու երկրների վարչապետները բանակցություններ կվարեն Բելառուսի պետական պարտքի վերաֆինանսավորման շուրջ՝ ՌԴ նախագահ Վլադիմիր Պուտինի հետ իր պայմանավորվածությունների հիման վրա: Միաժամանակ Լուկաշենկոն հստակեցրել է, որ «խոսքը ընթացիկ տարում ՌԴ-ի հանդեպ ունեցած պարտքից մեկ միլիարդ դոլարի վերաֆինանսավորման մասին է»: «Այսինքն, Ռուսաստանի հետ պայմանավորվելով, մենք մեզ պահենք այդ գումարը։ Եվ դա մեր ազգային արժույթի լավ ամրապնդում կլինի»,- ասել է Բելառուսի նախագահը։
Մինչդեռ «Ինտերֆաքս»-ի իրազեկ աղբյուրը հայտնել է, որ Մինսկը Ռուսաստանի կառավարությանը պաշտոնական հայտ է ուղարկել 2021թ․-ին ՌԴ-ի հանդեպ պետական պարտքի վերաֆինանսավորման համար, և Մինսկի հաջորդ տարվա պարտավորությունների գումարը կազմում է 600 մլն դոլար: Աղբյուրի խոսքով՝ Բելառուսը խնդրում է 15 տարի ժամկետով վերաֆինանսավորման համար միջոցներ հատկացնել։ «Ինտերֆաքս»-ի զրուցակիցը ասել է նաև, որ «այս շաբաթ վերաֆինանսավորման հարցը կքննարկվի երկու երկրների կառավարությունների ղեկավարների մակարդակով»:
Բելառուսի արտաքին պետական պարտքի վճարումները 2020թ․-ին կազմում են շուրջ 3,6 մլրդ դոլար, որից 2 մլրդ-ն արդեն վճարվել է: ՌԴ-ին բաժին է հասնում Բելառուսի արտաքին պետական պարտքի ավելի քան 60%-ը։