«Նիկոլ Փաշինյանի հրաժարականը ե՞րբ եք պահանջելու». լրագրողը՝ Միքայել Մելքումյանին

Այսօր՝ սեպտեմբերի 4-ին, ԱԺ-ում ԲՀԿ խմբակցության պատգամավոր Միքայել Մելքումյանը պատասխանել է լրագրողների մի շարք հարցերի:

«Ասում եք՝ եթե իշխանությունը սխալ քայլեր է անում, հո չե՞նք լռելու, հանրահավաքը դրա համար ենք անում, բա մարտի 1-ից հետո ինչի՞ հանրահավաք չարեցիք, իշխանությունն այդ ժամանակ ամեն ինչ ճի՞շտ էր անում»,- հետաքրքրվել են ԲՀԿ-ական պատգամավորից:

«Ես Մարտի 1-ին, ճշտն ասած, ակտիվ քաղաքական գործընթացների մեջ չեմ եղել, բայց եթե հետ գնանք, մանրակրկիտ քննարկենք, դրա պատասխանները կարելի է տալ»,- պատասխանել է Միքայել Մելքումյանը:

Հարցին, թե երբ են պահանջելու Նիկոլ Փաշինյանի հրաժարականը, ԲՀԿ-ական պատգամավորը պատասխանել է. «Որպեսզի նոր բաներ չասեմ, այն, ինչ հնչեցվել է հունիսին 5-ին, և դրանից հետո, այդ բոլորն ուժի մեջ են: Քաղաքական պայքարի զինանոցն այնպես չի, որ ամեն օր նույն բաները հայտարարես… Մի՛ շտապեք, կգա պահը, ամեն ինչ կտեսնեք: Ամեն ինչ թափանցիկ է, չէ՞, գաղտնի բաներ չի կատարվում»:

Հարցին, թե հանրահավաքը ե՞րբ է նախատեսվում և արդյոք հնարավո՞ր են այլ քաղաքական ուժերի մասնակցությունը, Միքայել Մելքումյանն ասել է, որ կուսակցությունում հանրահավաքի ժամկետի հետ կապված քննարկումներ չեն եղել, իսկ այն ուժերը, որոնք կկիսեն իրենց տեսակետներն ու մոտեցումները, կհամագործակցեն: