«Չի բացառվում, որ լինի ուղիղ հարված Արցախի բժշկական ենթակառուցվածքներին». Արսեն Թորոսյան

«Այս ժամանակատահվածում երրորդ անգամ եմ լինում Արցախում: Ստեփանակերտն ամբողջությամբ գտնվում էր ռմբակոծության տակ. հրթիռակոծվում էին թե՛ ռազմական օբյեկտները թե՛ խաղաղ բնակչությունն ու ոչ ռազմական օբյեկտները»,- այսօր ասուլսի ժամանակ հայտարարեց ՀՀ Առողջապահության նախարար Արսեն Թորոսյանը:

Նախարարը հայտնեց, որ Ստեփանակերտում գտնվող բժիշկները հաճախ չեն կարողանում անհրաժեշտ բուժօգնություն ցուցաբերել ադրբեջանական ագրեսիայից տուժածներին, քանի որ Ստեփանակերտն ու մի շարք այլ քաղաքներ գտնվում են օդային տագնապի տակ: Նախարարի խոսքով՝ նույնիսկ շտապօգնության մեքենաները չեն կարողանում օգնության հասնել:

«Ինքս եմ ականատես եղել Ստեփանակերտի Հանրապետական հիվանդանոցին շատ մոտ հարվածներին, այնքան մոտ էր, որ հիվանդանոցը դղրդաց հրթիռային հարվածից: Մեր բժշկական անձնակազմի մոտ կա այնպիսի տպավորություն, որ չի բացառվում՝ լինի ուղիղ հարված նաև բժշկական ենթակառուցվածքներին, ինչը կարելի է համարել պատերազմական հանցագործություն խաղաղ բնակչության նկատմամբ»,- հայտարարեց Արսեն Թորոսյանը: