«Չկործանվելու համար պետք է հոգեփոխվել, վերաիմաստավորել մեր գոյությունը»․ Գևորգ Գալստյան

Քաղաքագետ, «Ազգային-Ժողովրդավարական Բևեռ»-ի մասնակից Գևորգ Գալստյանը ֆեյսբուքյան էջում գրել է. «Հիմա ազգը կործանվելու աստիճան հուսահատության մեջ է և դա անհերքելի է: Հուսահատության գագաթնակետը դավաճանական ճանապարհներով ստեղծված պարտվածի կարգավիճակն է, որը խորթ է մեր ազգային հոգեկերտվածքին: Պարտվածի խորթ կարգավիճակում լինելն է, որ հոգեխանգարում է մեր ազգին: Մի կողմից՝ հայրենիքի մի մասի և մարդկային կորուստը, մյուս կողմից՝ պարտվածի կարգավիճակը, որի վրա հորթի հրճվանքով նայում է թուրքը: Այս ամենին գումարվում է մշուշոտ, չարագույժ գալիքը...
Այս ամենը կործանման է տանում...
Արտաքին աշխարհ ուղղված աղերսագին հայացքները «գետնի վրա» ոչ մի հուսադրող արձագանք չեն ստանում...
Կործանման անդունդին ենք նայում...
Մեր չարչարված «մարմնին» մի
աննշան «քամի» դիպչի՝ անդունդն է նայելու մեզ...
Բայց կա փրկության դարման: Էդ դարմանը մեր ներսում պետք է գտնենք: Դա է բուժելու, ամոքելու մեզ: Դրսի դարմանը սովորական ցավազրկող է՝ ժամանակավոր...
Չկործանվելու համար պետք է հոգեփոխվել, վերաիմաստավորել մեր գոյությունը, չհանդուրժել աշխարհաքաղաքական առևտրում գրոշի դերը, վերջապես ապրել որպես ազգ՝ հետևելով ազգային գաղափարախոսների՝ Նժդեհի, Րաֆֆու, Պատկանյանի, Նաթալիի, Հայկ Ասատրյանի, Շանթի և մնացած այլ երևելիների ավանդած գաղափարներին:
Սա ճառ չէ: Մեր ազգային գոյությունը պայմանավորող պարտադիր պայմանների նախանշում է: Եթե այս ամենը խորապես ընկալելուց հեռու ենք, նշանակում է հեռու է նաև մեր փրկությունն ու վերածնունդը»: