«Ապատեղեկատվություն է, թե Ոստիկանությունում աշխատանքից ազատման դիմումները շատ են». փոխոստիկանապետ

ՀՀ ոստիկանության պետի տեղակալ Արա Ֆիդանյանը Հանրային հեռուստաընկերության եթերում անդրադարձել է Ոստիկանության համակարգից սպայական անձնակազմի կողմից աշխատանքից ազատման դիմումներին:

Նրա խոսքով՝ տեղեկությունները, թե աշխատանքից դուրս եկող ծառայողների թիվը շատ է, «բացահայտ ապատեղեկատվություն է»:

«Այո՛, ազատման դիմումներ ստանում ենք, սակայն դրանց ծավալն այնքան մեծ չէ, որքան փորձ է արվում ցույց տալ: Մենք հետևում ենք զարգացումներին, մեր նախկին գործընկերների համացանցային հայտարարություններին և արդյունքում եկել ենք այն հետևությանը, որ ծավալների առումով բավականին ցածր են դրանք: Ավելին՝ ազատվածների, զեկուցագրերի մի մասը եղել են դեռևս 2018, 2019 թվականներին, ինչպես նաև՝ 2020 թվականի մինչ այս իրադարձությունները: Այդ նախկինում ազատվածների մասն էլ իրենց կամքով չեն հեռացել ոստիկանությունից, այլ ազատվել են որոշակի իրավախախտումներ կատարելու պատճառով»,- ասել է Ֆիդանյանը:

Նրա խոսքով՝ կան աշխատակիցներ, որոնք աշխատանքից ազատվել են, քանի որ չեն ցանկացել մեկնել պատերազմ, կամ, օրինակ, ունեցել են հանցավոր կապեր որոշ շրջանակների հետ և այլն:

Մանրամասները՝ տեսանյութում: